Almatyda ótken onlain suhbat barysynda Ftiziopýlmonologiia ortalyǵynyń juqpaly aýrýlar bóliminiń meńgerýshisi, ftiziohirýrg, pýlmonolog Abzal Malbasqanov koronavirýstyq pnevmoniiany basqa pnevmoniiadan qalai ajyratýǵa bolatyndyǵyn túsindirdi, dep habarlaidy QazAqparat.
«Adam ókpesi qabynyp jatqanyn bilmeýi de múmkin. Sebebi ókpeniń basty fýnktsiiasy - gaz almasý protsesi. Ókpede júike talshyqtary bolmaidy. Syrtqy qabyǵynda ǵana júike talshyqtary ornalasady. Al qabyný interstitsialdy tinde bolady. Ókpeniń tirshilik kólemi degen túsinik bar. Ol 3-5 litr bolady. Ádette jai adam ókpesiniń 50 paiyz ǵana múmkindigin qoldanady. Al sportshylar, ánshiler 100 paiyz múmkindigin paidalanady. Sondyqtan, ókpeniń qabynyp jatqanyn kei adamdar sezbeýi de múmkin. Tek alqynyp, tynys alý múmkindigi azaiǵanda ǵana adam pnevmoniia ekenin túsinedi», - dedi ol.
Dáriger maman koronavirýstyq infektsiianyń taralýyn tejeý úshin birqatar salt-dástúrimizden bas tartýǵa týra kep turǵanyn aitty.
«Qazaqstanda qazir indetti azaitý úshin birqatar qatań sharalardy qolǵa alýǵa týra kelip tur. Salt dástúr, ǵurpymyzdy qaita qarastyrýǵa týra keldi. Jaqsysyn alyp, jamanyn tastaý kerek boldy. Áleýmettik jelide jylt etkendi satyp alýǵa qajettilik joq. Salaýatty ómir saltyn ustaný kerek. Bizde adamdar as mázirine kóńil bólmeidi. Tez daiyn bolatyn, maily, qýyrylǵan tamaqtarǵa beiimbiz. Aýyrý kezinde suiyq tamaqty kóp paidalanyp, paidasy zor, vitaminder ishken durys. Kóbirek jemis-jidek, kókónis jeý kerek. Siz saqtansańyz, jaqyndaryńyzdy saqtasańyz, el bolyp indetti jeńetin bolamyz», - dedi pýlmonolog maman.
