Qazaqstandyq Ádilhan Erjanovtyń «Tún qudaiy» filmi rejisserdiń retrospektivasy boiynsha Frantsiiada kórsetiledi, dep habarlaidy "Ult aqparat" «Qazaqfilm» kinostýdiiasynyń baspasóz qyzmetine silteme jasap.
Qyrkúiek aiynyń 5-16 aralyǵynda Parij qalasynda ótetin «L'Etrange Festival» frantsýz kinofestivaliniń arnaiy «Focus» baǵdarlamasynda rejisser Á.Erjanovtyń barlyq filmderi kórsetiledi. Bul filmderdiń qatarynda QR mádeniet jáne sport ministrliginiń tapsyrysymen Sh.Aimanov atyndaǵy «Qazaqfilm» kinostýdiiasynda túsirilgen «Rieltor», «Qojaiyn», «Tún qudaiy» syndy kartinalar bar.
Festivaldi uiymdastyrýshylar óz tańdaýlary turǵysynda: «Erjanovtyń kinematografiiasyn qaitalanbaityn týyndylar quraidy. Ol jumbaq álem sekildi jáne onyń sheksiz interpretatsiiasy men kreativtiligin tutastai alyp baǵalaýǵa bolady. Bul jumbaq álemdi túsiný úshin onyń barlyq kórkem filmderin jinaqtap, «Focus» baǵdarlamasynda kórsetý kerek» dep túsinik bergen.
Bul jaiynda rejisser Ádilhan Erjanov «L'Etrange» festivali ózine «Qaratas aýylyndaǵy oba» filminen keiin nazar aýdarǵanyn aitady.
«Olar «Tún qudaiy» filmin kórsetýdi qalap, ony tutas bir jyl kútti. Bir jaqsysy, olar osynsha ýaqyt filmdi kúte aldy. Biz de olarǵa jetkize alǵan sekildimiz. Menińshe, olar filmderime eýropalyq kinosynshylardyń nazaryn aýdarǵysy keledi, sebebi, meniń filmderim olarǵa qyzyqty. Olarǵa jańasha túsirilgen filmder kerek», - dep oi bólisti rejisser.
Aita keterligi, «L'Etrange Festival» shirek ǵasyrǵa jýyq ýaqyt ótkizilip keledi. Bul festival «erekshe, qaitalanbaityn, sirek, joǵary deńgeidegi» filmderge arnalǵan. Festival baǵdarlamasynda negizgi baiqaý (Lars fon Trierdiń «Djek turǵyzǵan úi» filmi kórsetiletin) men qysqametrajdy filmderdiń baiqaýynan bólek, baiqaýdan tys baǵdarlamada japon jańa tolqynynyń filmderiniń kórsetilimi, ańyzǵa ainalǵan «Nikkatsu» japon stýdiiasynyń filmderiniń retrospektivasy, sondai-aq «Jańa talanttar», «Derekti kino» baǵdarlamalary bar.
