Dúisenbi kúni Frantsiiada belgili bir oryndarda «vaktsina pasportyn» kórsetýge mindetteitin erejeler kúshine endi, dep habarlaidy "Ult aqparat".
Endi Frantsiia turǵyndary dámhana, meiramhanaǵa kirerde jáne halyqaralyq saparǵa shyǵarda COVID-19 virýsyna qarsy vaktsinanyń tolyq komponentin alǵany týraly aqparaty bar vaktsinalaý sertifikatyn ne PTR-testileriniń nátijeleri jazylǵan anyqtamany kórsetýi tiis. Frantsiia biligi respýblikanyń Konstitýtsiialyq keńesi moiyndaǵan bul normanyń vaktsinalaýdy jyldamdatyp, koronavirýstyń «tórtinshi» tolqynymen kúreste mańyzdy ról atqarady dep úmittenip otyr.
«Jasyl pasport» - jańa komendanttyq saǵattar men lokdaýndardy boldyrmaýǵa kómektesýi tiis», - dep málimdedi Frantsiianyń Densaýlyq saqtaý ministri Olive Veran baspasózge bergen suhbatynda.
O. Veran erejelerge azdap ózgerister engizilgenin, atap aitqanda, PTR-testiler burynǵydai josparlanǵandai 48 saǵat emes, 72 saǵat buryn jasalýy múmkin ekenin jariialady. 21 shildeden bastap vaktsinalaý sertifikaty mádeni nysandar, teatr jáne murajailarǵa kirerde talap etiledi.
5 tamyzdaǵy jaǵdai boiynsha, COVID-19 virýsyna qarsy vaktsinanyń eki dozasyn Frantsiia turǵyndarynyń 49,7 paiyzy alǵan. Kópshilik arasynda júrgizilgen saýalnamalar nátijesinde frantsýzdardyń kóbi «jasyl pasporttyń» engizilýin qoldaitynyn kórsetti.
