Qazaqstandyq loýkoster Fly Arystan 2025 jyly jolaýshylardan artyq bagaj úshin 1,5 mlrd teńge kiris tapqan. Bul týraly áýe kompaniiasynyń qarjylyq esebinde kórsetilgen, dep habarlaidy ult.kz.
Loýkosterdiń standartty biletine salmaǵy 7 kelige deiingi, kólemi 56×23×35 santimetrden aspaityn qol júgi kiredi. Belgilengen normadan asqan bagaj úshin jolaýshylar qosymsha aqy tóleidi.
Kompaniia basshylyǵynyń 2025 jylǵy jalaqysy men bonýstaryn qosa alǵandaǵy syiaqysy 1,3 mlrd teńge bolǵan. Bir jyl buryn bul kórsetkish 820,7 mln teńgeni quraǵan.
Fly Arystan ótken jyldy 4,5 mlrd teńge shyǵynmen aiaqtaǵan. 2024 jyly kompaniianyń shyǵyny 3,6 mlrd teńge bolǵan. Osylaisha, shyǵyn kólemi bir jylda 27 paiyzǵa ósken.
Sonymen qatar kompaniianyń túsimi aitarlyqtai artqan. 2025 jyly Fly Arystan 203,1 mlrd teńge túsim alǵan. 2024 jyly bul kórsetkish 36,8 mlrd teńge bolǵan. Túsimniń 173,8 mlrd teńgesi jolaýshylar tasymalynan túsken.
Áýe kompaniiasy biyl qarashada áýe parkin Airbus A320neo ushaǵymen tolyqtyrýdy josparlap otyr. Sondai-aq aktsiia ornalastyrý arqyly 8 mlrd teńge tartý kózdelgen.
Fly Arystan 2018 jyly qurylǵan jáne Air Astana-nyń 100 paiyz enshiles kompaniiasy sanalady. 2024 jyly loýkoster jeke áýe paidalanýshysy sertifikatyn alǵan.
2026 jylǵy 1 naýryzdan bastap Fly Arystan prezidenti qyzmetine buǵan deiin Wizz Air kompaniiasynda jumys istegen Iohan Eidhagen taǵaiyndaldy.
