Qaznet qoldanýshylary KVI qarsy vaktsinatsiialanǵan ata-analardan týylǵan gibridter dep atalyp ketken sábilerdiń beinelerin taratýda, dep habarlaidy stopfake.kz saity.
Balalardyń adamdardan ózgeshe biologiialyq túr ókilderi ekendiginiń belgisi qara kózder bolyp tabylady. Bul teoriianyń nege durys emestigin túsindirip óteiik.
Jańa týǵan nárestelerdiń kóziniń túsi ártúrli bolýy múmkin, sondai-aq qara kózder jii kezdesedi. Evropeoidtyq násildiń balalary kózi sur nemese kók tústi bolyp týady. Aziia jáne ekvatorlyq násilge jatatyn balalardyń kózderi týǵannan qara bolady. Ádette, balalardyń kóziniń túsi birinshi jyly ózgeredi, biraq keide bul protsess uzaq ýaqytqa sozylýy múmkin.
Keide jańa týǵan náresteniń kózderi tolyǵymen qara, aǵy joq siiaqty bolyp kórinedi. Bul keibir nárestelerde týǵanda qabaǵy isip turatyndyqtan bolatyn illiýziia. Kózdiń aǵy jabylyp, kózdiń qarasy ǵana kórinip turady.
Keibir jaǵdailarda náresteniń kózderi qabaqtyń týa bitken buldyrlyǵyna bailanysty tolyǵymen qara bolyp kórinýi múmkin. Jeliden osyndai aýrýmen týǵan nárestelerdiń sýretterin kórýge bolady.
Qaznette taratylyp jatqan «gibrid» balalardyń sýretteriniń birinde keńsiregi kógergen jáne kóziniń aǵy qantalaǵan bala kórsetilgen. Bul rette videodaǵy mátinde bosaný qiyn bolǵany jáne bala bosaný kanalynan ótkende qysylyp qalǵan, bul gematomalardyń paida bolýyna ákeldi dep jazylǵan. Mundai problema búkil álemde kezdesedi jáne meditsinalyq ádebietterde egjei-tegjeili sipattalǵan.
Sondai-aq, kózdiń aǵynyń qantalap ketýine sýbkoniýnktivtik qan ketý sebep bolýy múmkin. Bul saý nárestelerde jii kezdesetin qaýipti jaǵdai emes. Ol bosaný kezinde usaq tamyrlardyń jarylýynan oryn alady.
Demek, jańa týǵan nárestelerdiń kóziniń qara bolýy erekshe jait emes.
Sondai-aq, video redaktorlarda óńdelgen bolýy yqtimal. Tolyǵymen qara kózder – bul montajdyń nátijesi.
Aita keteiik, kórsetilgen nárestelerdiń týǵan kúnderi týraly málimetter joq. Olar pandemiia bastalǵanǵa deiin dúniege kelýi múmkin. Sondai-aq, videodan osy sábilerdiń ata-analarynyń vaktsinatsiia mártebesin anyqtaý múmkin emes.
Jalpy, boiyn jyn nemese zulym rýh bilegen kózderi tolyǵymen qara balalar týraly ideia – bul 90-shy jyldardyń ortasynda AQSh taraǵan ańyz. Adamdar jolda nemese óz úileriniń bosaǵasynan kózi qara balalar men jasóspirimderdi kórgenderin aitqan. Balalar ózderin alyp ketýdi nemese dárethanaǵa jiberýin suraǵan. Snopes basylymy 2013 jyly bul ańyzdy joqqa shyǵardy jáne osy taqyryptaǵy barlyq derekterdi zerttei otyryp, kózderi qara balalar týraly áńgimeler fantastika bolyp tabylady degen qorytyndyǵa keldi.
KVI qarsy vaktsinatsiialanǵan adamdardan erekshe nemese «gibrid» balalar týady degen teoriia durys emes. Buǵan deiin Qaznet qoldanýshylary vaktsinatsiialanǵan ata-analardan týylǵan «transgendi» balalardyń bar ekenin dáleldeý úshin qara kózdi saý qyzdyń beinesin taratqan bolatyn.
Demek, vaktsinatsiialanǵan adamdardyń belgili bir jańa biologiialyq túr ókilderiniń ata-anasy bolatyndyǵyna eshqandai dálel joq. Nárestelerdiń kóziniń qara bolýy – bul qalypty jaǵdai, meditsinalyq ádebietterde buǵan dálelder kóp.
