Telegram messendjerinde qazaqstandyqtar Densaýlyq saqtaý ministrliginde KVI qarsy ekpe alǵan qyzmetkerler joq degen aqparat taratýda. Onyń avtory bul aqparatty vedomstvoda jumys isteitin dosynan estigenin aitady. Sondai-aq ol ózi de, áriptesteri de vaktsinalardyń ziiandy jáne qaýipti ekenin jaqsy biletindigin málimdegen. Munyń barlyǵy - ótirik, dep jazady Stopfake portaly.
Aldymen, aqparatta feiktiń barlyq belgileri bar ekenin atap ótkenimiz jón: onda el nemese qala ataýy kórsetilmegen. «Ministrlik qyzmetkeriniń» esimi nemese onyń laýazymy belgisiz. Mundai erekshelikterdiń bolmaýy, naqty aqparattyń berilmeýi jalǵan aqparattarǵa tán. Sondyqtan olardy tekserý jáne aqparattyń bastapqy derekkózin tabý qiynǵa soǵady.
StopFake.kz túsinikteme alý úshin QR Densaýlyq saqtaý ministrliginiń baspasóz qyzmetine júgindi. Olar vedomstvo qyzmetkerleri arasynda KVI qarsy vaktsinatsiiadan jappai bas tartý joq dep habarlady.
– Densaýlyq saqtaý ministrliginiń ortalyq apparatynda jumys isteitin memlekettik qyzmetshilerdiń sany – 205 adam. Onyń ishinde 21 adamda meditsinalyq qarsy kórsetilimder bar, olardyń qataryna úsh ai buryn aýyrǵandar da kiredi. Osylaisha, 184 adam vaktsinatsiialaýǵa jatady, onyń ishinde 178 adam eki komponentpen egildi jáne 6 adam birinshi komponentti aldy. Qyzmetkerler 100% derlik vaktsinatsiialandy, – dep habarlady ministrliktiń baspasóz qyzmeti.
Demek, habarlamanyń Qazaqstanǵa eshqandai qatysy joq jáne barlyq belgileri boiynsha ol feik bolyp tabylady.
