Ejelgi Egipettiń sý astyna ketken Geraklion qalasyn zerttep júrgen draiverler birshama qundy dúnie tapty, dep habarlaidy Live Science basylymyna silteme jasap.
Mysyrdyń Ejelgi eskertkishter ministrliginiń málimdeýinshe, tabylǵan artefaktilerdiń arasynda hramnyń qaldyqtary, altyn áshekeiler, monetalar, saltanatty qaiyqtyń bólikteri bar.
Gerakldyń esimimen atalǵan qala kezinde halyq qujynaǵan megapolisterdiń biri bolǵan. Ol bizdiń zamanymyzǵa deiingi VIII ǵasyrda Nil ózeniniń Jerorta teńizine quiar saǵasyna salynǵan. Kleopatra perǵaýynnyń ózi osy qaladaǵy hramdardyń birinde taqqa otyrǵan. Keiin, shamamen osydan 1500 jyl buryn ony sý basty. Qazir ol 45 metr tereńdikte qalyp qoiǵan.
Ǵalymdar 2000 jyly qalany tapqannan keiin, tarihtyń buryn belgisiz qyrlary ashyla bastady. Sońǵy zertteýler kezinde arheologtar záýlim hramnyń qaldyqtaryn tapqan.
Budan bólek, 75 qaiyq tabylǵan. Sonyń ishinde saltanatty sharalar kezinde qoldanylǵan №61 qaiyqtyń jetispei turǵan bóligi de bar.
Arheologtar qaiyqty qurastyrǵan soń, onyń uzyndyǵy 13 metr, eni 5 metr ekendigi belgili boldy. Qola jáne altyn monetalar, áshekei buiymdary da tabylǵan. Aitpaqshy, Geraklionnan tabylǵan qola monetalar II Ptolemei bilik qurǵan tusta, bizdiń zamanymyzǵa deiingi 283-246 jyldary soǵylǵan.
