Minskide ótetin Balalar Eýrovideniesinde Qazaqstan atynan óner kórsetetin Daneliia Tóleshovaǵa onlain daýys berý jalǵasýda, dep habarlaidy "Ult aqparat".
Baiqaý saitynda kez kelgen qazaqstandyq azamat ózine unaǵan 5 qatysýshyǵa, sonyń ishinde otandasymyz Daneliia Tóleshovaǵa daýys bere alady. Daýys berý 25 qarashada jabylyp, finaldyq kontsertten keiin taǵy 15 minýtqa ashyq bolady. Baiqaýdyń aqtyq kezeńiniń tikelei kórsetilimin 25 qarasha kúni saǵat 21:00-de «Habar 24» telearnasynan tamashalaýǵa bolady.
Al 23 qarashadan bastap saitta berilgen barlyq daýys eseptelip, upaiǵa ózgertiledi. Kórermenderdiń onlain daýys berýi barysynda jinalǵan barlyq upai - qatysýshyny baǵalaýdyń jartysy ǵana, qalǵany qazylar alqasynyń bergen upai sanymen birge baǵalanady.
