Beisenbi kúni Eýropalyq keńes otyrysynyń sońǵy kúni aiaqtaldy, onda Eýroodaqqa múshe 27 eldiń kóshbasshysy energiia tasymaldaýshylarynyń baǵalary men COVID-19 pandemiiasyna qarsy kúres júrgizý máselelerin talqylady, dep habarlaidy QazAqparat.
Eýropalyq kóshbasshylar sammitiniń qorytyndysy boiynsha, COVID-19 pandemiiasyna qarsy kúreske qatysty málimdeme jasaldy.
Eýropalyq Keńes búkil Eýropa boiynsha júrgizilgen vaktsinalaý naýqany virýspen kúres júrgizýde aitarlyqtai progreske ákelgenin atap ótti. Olai bolǵanymen, Eýroodaqqa múshe kei memleketterdegi jaǵdai óte kúrdeli bolyp qalyp otyr. Búkil EO boiynsha vaktsinalaý deńgeiin kóterý úshin vaktsinalaýǵa qatysty kúdikti joiý jaǵyna kúsh salý qajet. Sonyń ishinde ásirese áleýmettik jelilerde taratylatyn teris aqparatpen kúres júrgizý kerek, dep sanaidy Eýroodaqtyń úkimet jáne el basshylary.
Búdan basqa, Briýsselde COVID-19 virýsynyń jańa nusqalarynyń paida bolýyna qatysty qyraǵylyq tanytý kerektigi atap ótildi. Eýroodaq epidemiologiialyq jaǵdaidyń turaqtanýyna bailanysty EO ishinde erkin júrip-turý jáne oǵan kirýge kómekti úilestirýge úndep otyr.
EO kóshbasshylarynyń keńesi Eýrokomissiiany sertifikattardy úshinshi eldermen ózara moiyndaý jumysyn tezdetýge úndedi, delengen Eýropalyq Odaqtyń qorytyndy málimdemesiniń mátininde.
