BUU-nyń Glazgo qalasynda (Ulybritaniia) klimattyń ózgerýi jónindegi 26-shy konferentsiiasy (COR26) barysynda Eýropalyq komissiianyń prezidenti Ýrsýla fon der Liaien Eýropalyq Odaqtyń ormandardy saqtaýdyń jahandyq mindettemelerine qosqan úlesi retinde 1 milliard eýro bóletinin jariialady, dep habarlaidy QazAqparat.
EO biýdjetinen bólinetin 5 jyldyq qoldaý paketi Eýropalyq Odaqtyń seriktes elderine búkil álemdegi ormandardy qorǵaýǵa, qalpyna keltirýge jáne turaqty basqarýǵa, sondai-aq Parij kelisiminiń erejelerin oryndaýǵa kómektesedi.
- Orman – «Jerdiń jasyl ókpesi». Biz olardy qorǵap, qalpyna keltirýimiz kerek. Men álemdik ormandardy qorǵaýǵa 1 milliard eýro bólýge mindettenetinimizdi qýana jariialaimyn. Bul – EO-nyń «Jasyl kelisimge» sáikes planetamyzdy qorǵaýǵa baǵyttalǵan jahandyq ózgeristerge jetekshilik etý jónindegi mindettemesiniń belgisi,— dep málimdedi Ý.Liaien.
Eýrokomissiianyń halyqaralyq seriktestik jónindegi komissary Iýtta Ýrpilainen: «EO-nyń ormandardy turaqty basqarýǵa, qalpyna keltirýge jáne qorǵaýǵa qosqan úlesi turaqty ósýge jáne jumys oryndaryn qurýǵa, klimattyń ózgerý saldaryn jumsartýǵa jáne beiimdelýge, sondai-aq seriktes elderimizde bioártúrlilikti saqtaýǵa yqpal etedi. Eýropalyq Odaq úkimettermen, azamattyq qoǵammen, jergilikti halyqpen jáne jeke sýbektilermen seriktestikte turaqty damý maqsattaryna qol jetkizý jáne adamdar men planetany birinshi orynǵa qoiý úshin kópjaqty tásil aiasynda jumys isteidi», - dedi.
Eýropalyq Odaq óziniń ekojúiesi bar erekshe aýmaq Kongo ózeniniń basseinine erekshe nazar aýdardy. Málimdelgen 1 mlrd eýronyń 250 mln eýrosy kómek paketi sheńberinde Kongo ózeni basseinindegi ekologiialyq maqsattarǵa baǵyttalady.
Qarjylyq mindetteme – Eýropalyq Komissiianyń Glazgo qalasyndaǵy sammitte halyqaralyq qoǵamdastyq qabyldaǵan Ormandar jónindegi jahandyq mindettemege qosqan úlesi.
