Búgin elordadaǵy Táýelsizdik saraiynda Eýraziia elderi parlamentteri tóraǵalarynyń IV Keńesi jumysyn aiaqtady.
Osyǵan qarai QR Parlamenti Májilisiniń Tóraǵasy Nurlan Nyǵmatýlin baspasóz máslihatyn uiymdastyryp, elimizde alǵash ret ótken halyqaralyq sharany qorytyndylady, dep habarlaidy "Ult aqparat".
«Búgin biz kóptegen túrli pikirlerdi, tipti osy sessiia barysynda ótkir sóz sóileýlerdi de estidik. Bizdiń barlyǵymyz da uiymdastyrýshylarmen birge qatysýshylar arasynda dialog ornatý úshin barynsha qolaily jaǵdai jasaýǵa umtyldyq. Sonyń arqasyna senim men seriktestikti jolǵa qoiýǵa bolady. Bir keńespen memleketter, óńirler arasyndaǵy barlyq teketiresti alyp tastaý múmkin emestigi túsinikti de. Alaida, qalai desek te biz birlesken kúsh-jigerimizben barlyq seriktesterimizge kómektesýge tyrystyq», - dedi Májilis spikeri.
Onyń atap ótýinshe, búgingi keńeske qatysqan barlyq ókilder parlamenttik diplomatiia dialogynyń mańyzdylyǵyn jete túsingen.
«Biz qabyldaǵan qorytyndy málimdemede »Eýraziiada dialog, senim jáne seriktestik bolýy tiis« degen ortaq paiymymyzdy bildiremiz. Muny bizdiń halyqtarymyz kútip otyr. Biz tolyqqanda sessiia ótkizdik», - dedi Májilis tóraǵasy.
Nurlan Nyǵmatýlinnniń atap ótýinshe, keńes barysynda jiynǵa qatysýshylar túrli salalardaǵy kópjaqty jobalardy júzege asyrý barysyn talqylap. olardy zańnamalyq qamtamasyz etý boiynsha tájiribe almasty.
«Menińshe, búgin Parlament spikerleri jariia etken bastamalar men usynystar Eýraziia memleketterin seriktestiktiń jańa deńgeiine shyǵarýǵa múmkindik beredi jáne búkil eýraziialyq keńistiktegi qaýipsizdik pen birlikti qalyptastyrýǵa septigin tigizedi», - dedi ol.
