Qazaqstannyń memlekettik bas sanitarlyq dárigeri Aijan Esmaǵambetova Qazaqstanda koronavirýs juqtyrǵan 45 balanyń tórteýi jazylyp shyqqanyn málimdedi, dep habarlaidy "Ult aqparat".
«Qazaqstanda koronavirýs juqtyrǵan 45 bala tirkeldi. Olardyń tórteýi aýrýhanadan jazylyp, shyǵyp qoiǵan. Qalǵandarynyń jaǵdaiynyń dárejesi jeńil dep baǵalanyp otyr», - dedi Aijan Esmaǵambetova OKQ-da ótken baspasóz máslihatynda.
Sonymen qatar ol koronavirýs infektsiiasyn anyqtaý boiynsha Nur-Sultan men Almaty qalalarynda ekspress testten kimderdiń ótetinin aitty.
«Qazirgi tańda elge 96 myń test jetkizildi. Ekspress testter Nur-Sultan men Almaty qalalarynda júrgiziledi. Táýligine 500-den 1000-ǵa deiin test júrgizý josparlanǵan. Sonymen qatar meniń qaýlymmen ekspres testten ótetin adamdardyń sanaty belgilendi. Olar: jedel járdemniń meditsinalyq qyzmetkerleri, JRVI belgileri bar aýrýhanaǵa jatqyzylmaǵan adamdar, koronavirýs juqtyrǵan adammen edáýir qarym-qatynasta bolǵan adamdar, sondai-aq ótkizý beketteri arqyly avtoótkelder men temirjol ótkelderimen kelgen azamattar, tótenshe jaǵdaida jumys istep júrgen jergilikti atqarýshy organdardyń qyzmetkerleri», - dedi bas sanitar
Sońǵy derek boiynsha, Qazaqstanda 604 naýqas tirkelgen.
"Olarmen bailanysta bolǵan 17 342 adam anyqtaldy. Onyń 463-i elden ketken, qalǵan 16 879 adam tabylyp, 6 175-i aýrýhanaǵa jatqyzyldy. Úi karantinine 10 383 adam ornalastyryldy", - dedi bas sanitar dáriger.
Aitýynsha, bul baǵytta jumys jalǵasyp jatyr.
