Foto: Sputnik / Timýr Batyrshin
BAQ ókilderi joldaǵan saýalǵa Almaty qalasy boiynsha AFM departamenti jaýap berdi. Onda Jamalbek Baqdáýlet Erkinbekulyna qatysty asa iri mólsherde esirtki quraldaryn — kannabis syǵyndysyn zańsyz iemdený jáne saqtaý faktisi boiynsha tergeý júrgizilgeni aitylǵan.
Tergeý málimetterine sáikes, 2025 jylǵy tamyz aiynda kúdikti internet-resýrstar arqyly shet memleket aýmaǵynda esirtki quraldaryn ótkizýmen ainalysatyn tulǵalarmen bailanys ornatqan. Atalǵan zattar Tailand Koroldiginen halyqaralyq poshta jóneltilimi arqyly jiberilgen. Óziniń qatystylyǵyn jasyrý maqsatynda ol kásipkerlik qyzmet sheńberinde buryn alynǵan úshinshi tulǵalardyń derbes derekterin paidalanǵan.
"2025 jylǵy qyrkúiek aiynda kúdikti «Qazposhta» AQ arqyly kýrerlik jetkizýdi rásimdep, poshta jóneltilimin alýǵa áreket jasaǵan, alaida Almaty qalasyndaǵy saýda-oiyn-saýyq ortalyqtarynyń biriniń janynda jóneltilimdi alý kezinde Departament qyzmetkerleri tarapynan ustaldy.
Oǵan qatysty qamaýda ustaý túrindegi bultartpaý sharasy qoldanyldy.
Tergeý áli júrip jatyr", delingen habarlamada.
Degenmen ol adamnyń burynǵy ákimge týys ekeni naqty aitylmaǵan.
