QR Bas prokýrorynyń aǵa kómekshisi Rýslan Toqtaǵulov keshe ǵana Prezident qolǵan elimizde ólim jazasyn alyp tastaý týraly zańǵa qatysty pikir bildirdi, dep habarlaidy QazAqparat.
«2005 jyly bizdiń el azamattardyń saiasi quqyǵy týraly halyqaralyq paktige qol qoidy. Atalǵan pakti adam quqyǵy salasyndaǵy álemdegi ekinshi mańyzdy qujat. Birinshi ol adam quqyǵy týraly halyqaralyq deklaratsiia. Azamattardyń saiasi quqyǵy týraly halyqaralyq paktige sáikes eshqandai zań adam ómirin qoldan qiiýǵa ruqsat bermeýi tiis. Sonymen qatar osy pakt aiasynda halyqaralyq qaýymdastyq ólim jazasynan alyp tastaý týraly qosymsha hattama ázirledi. Bul hattamany Qazaqstan biyl 2 qańtarda ratifikatsiialady. Sodan soń bizge jańa zań jobasyn daiyndaý mindeti júkteldi. Bas prokýratýra zańdy ázirledi, Parlament qabyldap, keshe ǵana oǵan Memleket basshysy qol qoiyp bekitti. Zańdy qabyldaýǵa taǵy bir sebep, bizdiń el jyl basynda ólim jazasynan alyp tastaý týraly hattamany ratifikatsiialaǵannan keiin atalǵan jaza túrin alyp tastaýǵa mindetti boldyq», - dedi Rýslan Toqtaǵulov.
Mamannyń aitýynsha, elimizde ólim jazasyn alyp tastaýdan asa bir ózgeris bolmaidy.
«Óitkeni, buǵan deiin bizde ólimge moratorii boldy. Sondyqtan atalǵan salany úlken bir ózgeris kútip tur dep aita almaimyn. Esesine ólim jazasynyń ornyna ómir boiy bas bostandyǵynan aiyrý bar. Bul óte aýyr jaza túri der edim. Osy oraida óz basym elimizde ólim jazasyn alyp tastaýdy tolyq qoldaimyn. Onyń ústine bul halyqaralyq tájiribe. Álemniń 150 eli ólim jazasyna tyiym saldy. BUU-ǵa múshe elderdiń kóbisi atalǵan jaza túrin áldeqashan alyp tastaǵan», - deidi ol.
Sondai-aq, bas prokýratýra ókili «lańkestik áreket úshin» ólim jazasyn qaldyrý kerek degenge qatysty pikir bildirdi.
«Meniń oiym, terrorist ómirde óz tańdaýyn jasaǵan adam. Ony ólim jazasyna keskenmen másele túbegeili sheshilmeidi. Onyń ústine lańkestik áreket degenimiz ol qantógis. Al qanǵa qan degen bizdiń memlekettiń saiasi ustanymyna múldem qaishy. Sondyqtan kelispeimin», - dedi R. Toqtaǵulov.
