Shyǵys Qazaqstandaǵy Buqtyrma men Shúlbi sý qoimalarynan Ertiske jalpy kólemi 6,5 tekshe kilometr sý jiberiledi. Bul — ótken jylmen salystyrǵanda 1,5 ese kóp, dep habarlaidy "Ult aqparat".
Sý resýrstary komitetiniń sý resýrstaryn paidalaný jáne qorǵaý jónindegi «Ertis» basseindik inspektsiiasy basshysynyń orynbasary Eleýsiz Qambarov Kazinform agenttiginiń tilshisine bergen suhbatynda Shyǵys Qazaqstandaǵy qoimalar qazir sý jiberýdiń negizgi iadrosyna kiriskenin habarlady.
Iaǵni 13 sáýirden beri ózenge sekýndyna 3500 tekshe metr sý quiylyp jatyr. Bul qubylys 24 sáýirge deiin jalǵasady.
Onyń sózinshe, sýdyń alǵashqy legi Pavlodar oblysyna 20 sáýirde kelip jetedi dep kútilip otyr.
Ózenniń oipań tustarynda ornalasqan eldi mekender úshin sol ýaqytta qaýipti jaǵdai týyndaýy múmkin.
"Qazgidromet mekemesiniń gidrobeketteri berip otyrǵan málimetke súiensek, Ertistiń sýy ázirshe kóp kóterile qoiǵan joq. Mysal úshin Pavlodar qalasyndaǵy Zaton beketinde sý deńgeii 592 santimetrdi (qaýipti deńgei — 800 sm) jáne Avtomobil kópiri mańynda ol 479 santimetrdi (1084) kórsetip otyr. Ózenniń tómengi aǵysyndaǵy gidrobeketterdiń keibiri sý deńgeii tipti tómendep ketkenin tirkedi. Iaǵni Ertiste sý deńgeii ázirshe qalypty. 20 sáýirden bastap Ertis ózeni arqyly úlken tolqyndar keledi. Sol ýaqytta sý deńgeii kúrt kóteriledi dep kútilip otyr. Jiberiletin sý eń áýeli jaiylmalardyń sýǵa qanyǵýy úshin jasalyp otyrǵan shara ekenin eskerý kerek. Sý mol ekpinmen kelse, jaiylmalarǵa mol sý shyǵady. Shamamen 300 myń gektardan astam aýmaqty sý basýy kerek. Ekinshi másele, ózenniń oipań tustarynda ornalasqan eldi mekenderge tasqyn sýdyń kirý yqtimaldylyǵy. Bizdiń shamalaýymyzsha, Mai aýdanynyń Qaratarek, Kóktóbe, Aqsarai aýyldaryna, Pavlodar qalasynyń Kenjekól, Atameken kentteriniń tómengi aýmaqtarynda, Pavlodar aýdanynyń Michýrin aýylynda sýdyń jaiylýy bolýy múmkin. Jergilikti bilik jaqsy qamdansa, turǵyn úilerge tónip turǵan sonshalyqty qaýip joq", -deidi E.Qambarov.
