- Qansha Olimpiadaǵa barsam da, dál osyndai soraqylyqty kórgen joqpyn, - dep málimdedi Olimpiada oiyndarynyń jeńimpazy búgin Riodaǵy QazAqparat tilshisine bergen suhbatynda.
Búgin Sidnei olimpiadasynyń chempiony Ermahan Ybyraiymovty jolyqtyryp qaldyq. Osy múmkindikti paidalanyp Ermahan Saǵiulynan Olimpiada týraly pikir suraǵan bolatynbyz.
- Rioǵa qashan keldińiz?
- Ótip bara jatqan túnde keldim.
- Kimderge jankúierlik etip keldińiz?
- Ózim boksshy bolǵan soń bylǵary qolǵap sheberlerine qoldaý kórsetý azamattyq boryshym. Biraz boksshylarymyzdyń finaldaǵy aiqastaryn kórýge keldim. Keshe Daniiar Eleýsinov finalǵa shyǵypty. Mine, búgin Ádilbektiń finalǵa ótkenin óz kózimmen kórip qatty qýanyp otyrmyn. Dychko da jartylai finalǵa ótti. Bul da úlken qýanysh.
- Osy úsh boksshynyń qaisysy altynǵa laiyq dep oilaisyz?
- Úsheýi de altyn jigitter. Úsheýi de altynǵa laiyq. Úsheýi de chempion bolyp jatsa, tańǵalmaimyn.
- Keshegi Levittiń kúmis júldesine kóńilińiz tola ma?
- Men Levit aiqasqan kúni jolda boldym. Jekpe-jegin óz kózimmen kóre almadym. Biraq, kelgen soń osyndaǵy jigitterden estip jatyrmyn. Aiqyn basymdyqpen utyp turǵan jeńisti qalai basqa bireýdiń alaqanyna salyp bere salady? Men tóreshilerdi túsinbedim. Eger teń dárejede óner kórsetse, qarsylasyna jyǵyp bersin. Onda meniń daýym joq. Dál endi búkil zal ǵana emes, jer sharynyń turǵyndary kórip otyrǵan ádildikti ringtiń túbinde otyrǵan bes tóreshi qalai betteri búlk etpei basqa bireýdiń ýysyna salyp berdi.
Men osyǵan deiin qanshama Olimpiada oiyndaryna bardym. Biraq, dál osyndai soraqylyqty kórgen joqpyn. Jańa ǵana jigitterimizdiń aldynda qazaqtyń qaratory qyzy Jaina Shekerbekovanyń jekpe-jegin kórdim. Jaina jeńilgen joq. Men boksshy retinde, bapker retinde ustaz retinde qaryndasymyzdyń ár soqqysy men qoldanǵan aila-tásilin qadaǵalap otyrdym. Qazaq qyzyna da tóreshiler qiianat jasaǵany kórinip turdy.
- Basqa basqa emes, tóreshilerdiń Olimpiada oiyndaryndaǵy mundai "aram" áreketteri neni bildiredi?
- Bul - sporttyń lastanǵanyn bildiredi. Bul - sporttaǵy jemqorlyqty bildiredi. Bul - "sum" saiasattyń sportqa da aýyz sala bastaǵanyn bildiredi.
- Budan qutylýdyń joldary bar ma?
- Árine! Sol qolmen jasaǵan dúnieni oń qolmen ózgertýge bolady. Biraq, ýaqyt kerek, úlken reforma kerek.
- Eger bul úrdis jalǵasa berse ne bolady?
- Tórt jylda bir keletin jarystyń tóresi atanǵan Olimpiada oiyndarynyń bedeli joiylady. Qazir bireýler Olimpiadaǵa qatysýdy armandap júrse, keiin Olimpiadaǵa barýdan bas tartatyn bolady. Búgin Levit búgin ádiletsizdiktiń qurbany boldy, erteń de solai bolmasyna kim kepil. Osyndai ádiletsizdikterden qanshama jas sportshylar janyp ketip jatyr. Jeńip turǵan sportshydan jeńisti tartyp alý degen sóz - onyń azamattyǵyna, adamdyq quqyǵyna qol suǵý degen sóz. Sol sportshyny qorlaý degen sóz. Tek sportshyny ǵana emes, ol sportshy qai eldiki bolsa, sol eldi de qorlaý dep túsinemin.
- Áńgimeńizge rahmet!
Kúnsultan Otarbai
