Aqtóbege issapary kezinde IIM Erlan Turǵymbaev volonterlermen kezdesip, karantin rejimin jáne qoǵamdyq tártipti saqtaýdy qamtamasyz etýge kómekteskeni úshin olarǵa alǵys aitty, dep habarlaidy "Ult aqparat".
Ishki ister ministri Erlan Turǵymbaev Aqtóbe oblysyna jumys sapary aiasynda oblystyq politsiia departamentiniń birqatar nysanyn aralady. Olardyń qatarynda Aqtóbe qalasynyń ortalyǵynda ornalasqan modýldik statsionarlyq beket bar. Bekette politseilerdiń jumys isteýine jáne azamattardy táýlik boiy qabyldaýyna barlyq jaǵdai jasalǵan. Ministr jergilikti atqarýshy organdardyń halyqtyń qaýipsizdigi men tynyshtyǵyn qamtamasyz etýge baǵyttalǵan jumysyn joǵary baǵalady. Damyǵan elderdiń tájiribesi boiynsha qazirgi zamanǵy statsionarlyq politsiia beketteri neǵurlym kriminogendi ýchaskelerde ornatylyp jatyr. Aqtóbede bes beket bar.
«El Prezidenti Qasym-Jomart Toqaev servistik modeldiń negizgi elementi «halyqqa jaqyn politsiia» bolýy tiis dep aitty. Osy qaǵidatty iske asyra otyryp, biz politsiia qyzmetkeriniń qoǵamdyq oryndarda júrýine qol jetkizdik. Azamattar ózderin qaýipsiz sezinýine, qajet kezde politsiiaǵa júginýine bar jaǵdai jasaldy. Búgin biz oń nátijeni kórip otyrmyz. Statsionarlyq beketter ornatylǵan jerlerde quqyq buzýshylyqtar sany aitarlyqtai azaidy», – dep atap ótti vedomstvo basshysy. 2020 jyly oblys aýmaǵynda qylmys 37% tómendedi. Ministr jergilikti politsiia qyzmetin reformalaý máselesinde ýchaskelik inspektorǵa negizgi ról beriletinin atap ótti. Osyǵan bailanysty Erlan Turǵymbaev politsiia qyzmetkeri otbasymen birge turatyn ýchaskelik pýnktpen biriktirilgen úige bardy. Ministr ýchaskelik politsiia inspektorynyń únemi ákimshilik ýchaskede bolýy mańyzdy ekenin jáne óńirde quqyq buzýshylyqtyń aldyn alýdy qamtamasyz etý úshin olardyń shtatyn ishki rezervter esebinen tolyq jasaqtaý qajet ekenin atap ótti.
«Ákimdiktermen birlesip, ýchaskelik inspektorlarǵa tiisti jaǵdai jasap, ýchaskelik pýnktter jelisin keńeite otyryp, biz azamattarymyzdyń qaýipsizdik deńgeiin arttyramyz. Mundai jumysty biz barlyq óńirlerde júrgizetin bolamyz», – dedi Ishki ister ministri.
Aita keteiik, quqyqtyq tártipti qamtamasyz etýde eriktiler politsiia qyzmetkerlerine kómek kórsetip keledi. Oblys boiynsha ishki ister organdary ótkizetin barlyq aldyn alý is-sharalaryna 300-den astam erikti qatysady. Ministr eriktilermen kezdesip, olarǵa karantin rejimin jáne qoǵamdyq tártipti qorǵaýdy qamtamasyz etýge kómekteskeni úshin alǵys aitty. Keiin jeke qurammen kezdesip, oblystyq politsiia departamenti qyzmetkerleriniń aldyna óńirdegi qaýipsizdik deńgeiin arttyrý jáne halyqpen jumysty jalǵastyrý, olardyń máselelerin dereý sheshý mindetterin qoidy.
