Aqmola oblysynyń Ereimentaý aýdanynda beimálim dertten 19 iri qara qyryldy, dep habarlaidy QazAqparat.
Oblystyq veterinariia basqarmasynyń málimetinshe, úi janýarlary arasyndaǵy etiologiiasy belgisiz aýrý Ereimentaý aýdanynyń 5 eldi mekeninde (Ereimentaý qalasy, Aqmyrza, Erkinshilik, Verenka jáne Eńbek aýyldary) jáne 14 mal jaiylym ýchaskelerinde tirkelgen. Aýdan boiynsha barlyǵy 2,5 myń bas iri qara jáne 1,7 myń bas qoi-eshki aýyrý juqtyrǵan. 19 bas iri qara mal qyryldy.
Qazirgi kezde, veterinarlyq qyzmet mamandary barlyq eldi mekenderdegi aýrý mal basyn tekserip, simptomatikalyq em júrgizýde.
«Ereimentaý aýdanynyń veterinarlyq stantsiiasy Aqmola oblysynyń vetrinariia basqarmasy janynan aýrý maldardy emdeý úshin qaitarymdy qarajat retinde 5 million teńge somasyna veterinariialyq preparattar satyp aldy. Zańnamaǵa sáikes emdeý mal ieleri esebinen júrgiziledi», - delingen vedomstvo habarlamasynda.
Sonymen qatar Ereimentaý aýdanynda jappai dertke shaldyqqan úi janýarlarynan alynǵan zerthanalyq synama aýsylǵa teris nátije kórsetti.
Osy rette, veterinar mamandar janýarlardyń ielerine etiologiiasy belgisiz aýrýdyń aldyn alý sharasy retinde shiki sútti, sondai-aq onyń negizinde daiyndalǵan ónimderdi qoldanbaýǵa keńes beredi. Aldyn alýdaǵy óte mańyzdy shara-sútti qainatý jáne pasterleý qajettigin eskertedi.
