Memleket basshysynyń tapsyrmasy boiynsha aimaqtaǵy epidemiologiialyq jaǵdaimen tanysý úshin Premer-Ministrdiń orynbasary Eraly Toǵjanov bastaǵan úkimettik delegatsiia Atyraý oblysyna keldi, dep habarlaidy "Ult aqparat" COVID-19 taralýyna jol bermeý jónindegi vedomstvoaralyq komissiiaǵa silteme jasap.
Jumys sapary aiasynda «SK-Farmatsiia» JShS qoimalary tekserilip, meditsinalyq mekemelerdiń bir ailyq turaqty qormen qamtamasyz etilýi tekserildi.
Qazirgi kezde atalǵan mekemelerdi dári-dármekpen qamtý jolǵa qoiylǵan. Atap aitqanda, «SK-Farmatsiia» apta saiyn 338 túrli preparattar jetkizip keledi. Bunyń syrtynda oblystyń dárihanalaryna da sońǵy eki apta ishinde 80 tonna dári-dármek ákelingen.
Negizgi medikamentter boiynsha oblystyń barlyq meditsinalyq mekemelerinde bir ailyq qor bar, alaida, qajetti segiz dári boiynsha qor bir aptaǵa ǵana jetedi. «SK-Farmatsiia» JShS Basqarma tóraǵasy E.Iskaliev atalǵan máseleni úsh kúnniń ishinde sheshýge daiyn ekenin jetkizdi.
Premer-Ministrdiń orynbasary «SK-Farmatsiia» kompaniiasyna oblys ákimdigimen birlese otyryp, úsh ailyq medikamentter qoryn qalyptastyrý úshin ótinim berý jumystaryn júrgizýdi tapsyrdy.
Oblystaǵy epidemiologiialyq ahýaldy odan ary turaqtandyrý maqsatynda shuǵyl sheshiderm qabyldaý úshin jiyn ótkizildi. Jiyn sońynda meditsinalyq mekemelerdi ókpeni jasandy jeldetý apparattarymen jáne ottegi kontsentrattarymen tolyq jabdyqtaý úshin naqty sheshim joldary ázirlenip, protokoldyq tapsyrmalar qabyldandy.
Sonymen qatar, Eraly Toǵjanov túsindirý jumystaryn kúsheitýdi jalǵastyryp, halyq sanitarlyq normalardy saqtaýǵa basa mán berý kerektigin atap ótti.
Premer-Ministrdiń orynbasary Eraly Toǵjanov óńirge sapary aiasynda COVID-19-ǵa arnalǵan infektsiialyq stantsionar retinde jumys istep jatqan Atyraý oblystyq №2 aýrýhanasyna da bardy. Onda barlyǵy 1557 adam koronavirýs infektsiiasymen túsip, olardyń 1386-si jazylyp shyqqan.
Oblysta qazirgi kezde infektsiialyq oryndar 60 paiyzǵa artqan. Al shilde aiynyń basynan beri atalǵan oryndar 83 paiyzdan 61,7 paiyzǵa deiin bosaǵan.
Qosymsha sapaly meditsinalyq kómek kórsetetin táýlik boiy jumys isteitin kol-ortalyq uiymdastyrý arqyly jádel járdemge túsetin qońyraýlar 1300-den 700-ge deiin azaiǵan.
Kún saiyn reid ótkizetin 114 monitoringtik top 563 buzýshylyqty anyqtap, 10 million teńgeden astam somanyń aiyppuly salynǵan.
