Búgin QR Premer-Ministriniń orynbasary Eraly Toǵjanov Atyraý oblysyna jumys saparymen kelip, óńirdegi epidemiologiialyq ahýalǵa qatysty shuǵyl jiyn ótkizdi, dep habarlaidy "Ult aqparat".
Premer-Ministrdiń orynbasary bastaǵan delegatsiia quramynda Densaýlyq saqtaý ministriniń birinshi orynbasary Marat Shoranov, Energetika vitse-ministri Áset Maǵaýov, Reseidiń Tutynýshylar quqyǵyn qorǵaý jáne adam saýlyǵy federaldy qyzmetiniń «Mikrob» ǵylymi ortalyǵynyń jetekshi ǵylymi qyzmetkeri Irina Sharova, Reseidiń Tutynýshylar quqyǵyn qorǵaý jáne adam saýlyǵy federaldy qyzmetiniń Týla oblysyndaǵy basqarma basshysy orynbasary Zalimhan Omariev bar.
«Atyraý oblysynda búginde koronavirýs infektsiiasyna shaldyqqandar sany 7150 adamǵa jetti. Jazylyp shyqqandar sany - 4693 adam, al, 13 adam kóz jumǵan. Epidemiologiialyq ahýaldy turaqtandyrý maqsatynda oblystyq aýrýhana janynan jýyrda 400 oryndyq karantindik statsionar ashylatyn bolady», -dedi Eraly Toǵjanov.
Oblys ákimi Mahambet Dosmuhambetovtiń málimetinshe, qalalyq emhanalar janynan statsionarlar jasaqtalyp, naýqastardy emdeý sharalary atqarylýda. Sall-ortalyq ashylyp, táýlik boiy bilikti mamandar turǵyndarǵa keńes berýde. Qazirgi ýaqytta oblysta 694 infektsiialyq, 895 provizorlyq, 2328 karantindik statsionarlar jumys istep jatyr.
Búginde statsionarlar 115 IVL apparatymen, 29 rentgen apparatymen qamtylǵan.
Sonymen birge, 4 kompiýterlik tomografiia bar. Emhanalar janynan 61 mobildi top jasaqtalǵan. Olar koronavirýs infektsiiasynyń simptomsyz jáne jeńil túrimen aýyrǵandarǵa úi jaǵdaiynda ambýlatorlyq kómek kórsetýde.
Koronavirýspen qatar, Atyraýda pnevmoniiamen syrqattanǵandardyń sany 1307 adamdy qurap otyr. Óńirde dári-dármek tapshylyǵy máselesi sheshilýde. Qala men aýdandardyń dárihanalaryna eń qajetti antibiotikter, qyzý túsiretin dáriler jetkizilip jatyr.
Qazirgi ýaqytta Atyraýda pandemiiamen kúreske 1429 dáriger maman jumyldyryldy. Biraq, meditsina mamandary jetispeýshiligi máselesi ótkir seziledi. Atyraýda 278 dáriger jetispeidi. Atalǵan máseleni sheshý úshin Reseimen kelissózder jasalyp, óńirge jas mamandardy tartý jumystary júrgizilip jatyr. Sonymen qatar, basqa óńirlerde internatýra men ordanitýrada bilimderin jetildirip, taǵlymdamadan ótip júrgen 122 atyraýlyq jas maman indetpen kúreske jumyldyrylatyn bolady.
QR Premer-Ministriniń orynbasary Eraly Toǵjanov azamattardyń karantindik talaptardy muqiiat saqtaýy úshin atqarylyp jatqan jumystardy kúsheitý qajettigin tapsyrdy.
