QR Premer-Ministriniń orynbasary Eraly Toǵjanov ortalyq jáne jergilikti atqarýshy organdardyń qatysýymen negizgi áleýmettik máseleler boiynsha keńes ótkizdi, dep habarlaidy "Ult aqparat" Úkimet basshysynyń resmi saityna silteme jasap.
Bilim jáne ǵylym, densaýlyq saqtaý, mádeniet jáne sport, aqparat jáne qoǵamdyq damý ministrleri áleýmettik salanyń negizgi baǵyttary boiynsha atqarylyp jatqan jumys barysyn baiandady. Memleket basshysynyń 2021 jylǵy 1 qyrkúiektegi «Halyq birligi jáne júieli reformalar – el órkendeýiniń berik negizi» atty Qazaqstan halqyna arnaǵan Joldaýynda aitylǵan tapsyrmalaryn oryndaýǵa erekshe nazar aýdaryldy.
Bilim jáne ǵylym ministrliginiń derekterine sáikes búginde respýblikada jalpy kontingenti 250 myń balany quraityn 147 mektep úsh aýysymda jumys isteidi. Olardyń eń kóp sany Almaty (50), Mańǵystaý (16) oblystarynda, Shymkent qalasynda (14) ornalasqan.
Vitse-premer úsh aýysymdy oqytý, oqýshy oryndarynyń tapshylyǵy problemalaryn jedel sheshýdiń mańyzdylyǵyn atap ótti. Ol úshin ońtaily sheshim – jyldam turǵyzylatyn az shyǵyndy modýldik mektepter salý.
Densaýlyq saqtaý salasynda joǵary bilikti kadrlar tapshylyǵy, aýrýhanalardy qazirgi zamanǵy jabdyqtarmen jaraqtandyrý problemalary ózekti kúiinde qalyp otyr. Búgingi tańda meditsina qyzmetkerleriniń áleýmettik qoldaý sharalarymen tómen qamtylýy Túrkistan oblysynda 7%, Aqtóbe oblysynda 12%, Almaty oblysynda 13% jáne Pavlodar oblysynda 18% quraidy.
E. Toǵjanov meditsina kadrlaryn daiarlaýǵa granttar sanyn kóbeitýdi, barlyq jas mamandardy áleýmettik qoldaý sharalarymen qamtamasyz etýdi, oǵan qosymsha qajettilikti anyqtaý úshin meditsinalyq jabdyqtarǵa egjei-tegjeili inventarizatsiia júrgizýdi tapsyrdy.
Buqaralyq sport salasynda balalardy memlekettik sporttyq tapsyryspen qamtýdyń eń tómen kórsetkishteri Soltústik Qazaqstan, Túrkistan, Qostanai oblystarynda baiqaldy.
Premer-Ministrdiń orynbasary halyqty, birinshi kezekte balalardy buqaralyq sportpen qamtýdy ulǵaitýǵa, dene shynyqtyrý-saýyqtyrý keshenderin, mádeniet obektilerin salýǵa, kitaphanalar men muraǵattar jumysyn jańǵyrtýǵa erekshe kúsh salý kerektigin atap ótti.
Vitse-premer Qazaqstan Respýblikasy Táýelsizdiginiń Z0 jyldyǵyn merekeleýge búkil qoǵamdy tartý, sondai-aq iske asyrylyp jatqan memlekettik baǵdarlamalar men jobalarǵa azamattardyń qatysýy úshin aqparattyq-túsindirý jumystaryn jandandyrý jónindegi jumysty kúsheitýdi tapsyrdy.
Sondai-aq ákimdikterdiń aqparatyn tyńdaǵan Premer-Ministrdiń orynbasary E. Toǵjanov jergilikti jerlerde qarjylandyrýdyń qajetti kólemin qamtamasyz ete otyryp, áleýmettik sipattaǵy ózekti máselelerdi sheshý jóninde birqatar naqty tapsyrma berdi.
Keńes baǵdarlamasy sheńberinde óńirler ákimderiniń orynbasarlary salynyp jatqan 800 tósektik kópbeiindi ýniversitet aýrýhanasynyń jáne BINOM jańa formattaǵy mektebiniń tusaýkeserine qatysty, sondai-aq tez turǵyzylatyn modýldik mektepter salý arqyly jańa oqý oryndaryn qurýdyń ońtaily nusqalary kórsetildi.
