Eýropanyń barlyq elinde aýrý kórsetkishi artyp keledi. Aýstriia, Germaniia men Niderland úkimetteri sanitarlyq talaptardy kúsheitý týraly máseleni qarastyryp jatyr, dep habarlaidy QazAqparat.
Epidemiologiialyq ahýaldyń nasharlaýyna bailanysty Aýstriia úkimeti endi el turǵyndaryna bar-meiramhanaǵa, túngi klýb, sport ortalyǵy, mádeni mekemelerge jáne shashtarazǵa barý úshin tolyq vaktsina alǵanyn nemese buryn koronavirýspen aýyryp jazylǵanyn rastaityn qujatty kórsetý qajet dep málimdedi.
Buǵan deiin Aýstriiada 11 myńnan astam koronavirýs juqtyrǵan adam tirkelgen.
Germaniiada Berlin senaty jazǵy terrassasy joq kafe men meiramhana, shashtaraz ben kinoteatrǵa 18 jastan asqan vaktsinalanbaǵan adamdar kirmeidi, dep málim etti. Infektsiiany juqtyrǵandardyń kóbeiýine bailanysty osyndai sheshim qabyldandy. Sársenbide Germaniiada pandemiia bastalǵannan beri aýrýǵa shaldyqqandar sany eń kóp tirkeldi, sonymen qatar aýrýhanalada, ásirese el astanasynda jaǵdai nasharlap ketken.
Sársenbide koronavirýs juqtyrýǵa qatysty 12 700 jańa jaǵdai tirkelgen Niderlandta qatań shekteý sharalary qarastyrylýy múmkin. Óitkeni epidemiolog sarapshylar toby úkimetke eki aptaǵa qysqa merzimdi oqshaýlaý rejimin jariialaýdy usyndy. Bul shara osy ýaqyt aralyǵynda kinoteatr, teatrlardy jabýdy, sondai-aq basqa da buqaralyq sharany ótkzbeýdi qarastyrady. Sondai-aq, mamandar qoǵamdyq tamaqtaný oryndarynyń jabylý ýaqytyn shekteýdi usyndy.
Belgiiada da Covid-19 juqtyrǵandar sany artyp ketti. Alaida, ázirge Belgiia saiasatkerleri turǵyndardy qashyqtan jumys isteý rejimine oralýǵa shaqyrdy. Belgiia úkimeti janyndaǵy Konsýltativtik komitet kelesi aptada epidemiologiia jai-kúiin talqylaý úshin bas qosady. Sonymen qatar, Briýssel aimaǵy koronavirýs vaktsinasynyń «kúsheiýshi» dozasyn saldyra bastaý úshin 2022 jyldyń sáýirine deiin tórt vaktsinatsiia ortalyǵyn ashyq ustaýdy josparlap otyr.
Belgiianyń densaýlyq saqtaý ministrleri jeltoqsannyń ortasynan bastap Johnson&Johnson vaktsinasyn bir ret alǵan adamdarǵa qosymsha ekpe egýdi maquldady.
