Energetika ministrligi Qazaqstannan reseilik kólikterdiń janarmai quiýy týraly videoǵa túsinikteme berdi, - dep habarlaidy Tengrinews.kz.
Buǵan deiin áleýmettik jelilerde video taraǵan. Video avtory 5 qazanda Aqtóbe oblysynda reseilik nómirdegi kólikter janarmai quiý stantsiialarynan janarmai quiyp alyp jatqanyn kórsetedi.
"Qazaqstanda dizel otyny joq deidi. Mine, reseilik kólikter kelip, Álimbetovten janarmai quiyp jatyr. Olar dizel otynyn syrtqa shyǵarady, biraq bizge bermeidi. Olarǵa 164 teńgeden beredi, bizge 270 teńgege bermei qoiǵan. Osylai kúnine 90 tonnadan shyǵarylady. Gazben birdei. Kúnine úsh-tórt reis jasalady", - deidi video avtory.
Qazaqstannyń Energetika ministrligi kólikterge dizel otyny emes, benzin quiylǵanyn málimdedi.
"Aqtóbe ákimdiginiń aqparaty boiynsha, "Ýbaidýllin M." JK JQS-da AI-92 markaly benzin litrine 164 teńge baǵamen satyldy. Bul JQS-ta dizel otyny satylmaidy. Badamsha jáne Qos-Estek aýyldarynda dizel otyny erkin satylyp jatyr", - delingen vedomstvo jaýabynda.
Sondai-aq, ministrlik munai ónimderiniń tapshylyǵyn boldyrmaý úshin buryn IIM, UQK jáne Qarjy ministrligimen benzindi, dizel otynyn jáne munai ónimderiniń jekelegen túrlerin avtomobil kóligimen alty ai merzimge áketýge tyiym salýdy kózdeitin birlesken buiryq qabyldanǵanyn habarlady. Buiryq mailaýǵa arnalǵan mai áketýge jáne benzin baktarynda munai ónimderin áketken jaǵdaida, sondai-aq, kólemi 20 litrden aspaityn jeke syiymdylyqtarda JJM áketken jaǵdaida qoldanylmaidy. Buiryq merzimin qarashadan bastap taǵy alty aiǵa uzartý josparlanyp otyr.
Vedomstvoda qazaqstandyqtarǵa otyndy áketý derekterin baiqaǵan kezde IIM, Memlekettik kirister komiteti nemese UQK Shekara qyzmeti organdaryna habardar etýge keńes beriledi.
Buǵan deiin energetika ministri Maǵzum Myrzaǵaliev elde otyn daǵdarysy "búgin ǵana bolyp otyrmaǵanyn" dep málimdegen bolatyn.
"Tamyzdan bastap qorymyz azaia bastady. Oǵan qosa, egin jinaý jumystary júrgizildi, sáikesinshe, elimizdiń munai bazalarynda qor óte tómen", - dedi ministr 30 qyrkúiekte.
