Eńbek jáne halyqty áleýmettik qorǵaý vitse-ministri Nariman Muqyshev jumyssyz qalǵan azamattar Enbek.kz portalynda ózine kerekti aqparatty qalai taba alatynyn túsindirdi, dep habarlaidy QazAqparat tilshisi.
Nariman Muqyshev Facebook-paraqshasynda jazǵandai, enbek.kz portalyn qoldanysqa yńǵaily etip ózgertý boiynsha jumystar júrgizilip jatyr.
Soǵan orai, azamattardyń ártúrli sanatyn jumyspen qamtý týraly aqparattar saittyń birinshi betine ornalastyrylǵan. Sol aqparat arqyly kez kelgen azamat óz sanaty boiynsha tirkelip, jumys izdei alady. Olar:
- jumyssyzdar;
- jastar;
- erekshe qajettiligi bar azamattar;
- jaldamaly jumysshylar;
- bosap qalǵan jumysshylar (jumys berýshiniń sheshimimen jumyssyz qalǵandar nemese jumysshylar shtatynyń qysqarýyna bailanysty jumyssyz qalǵandar);
- tabysy az jumysshylar (kirisi kúnkóris minimýmynan az nemese biliktiliksiz eńbekke tartylǵandar).
«Ózińiz enetin sanatty tańdap alyp, memleket naqty kontingentke qandai qoldaý sharalary men jumys usynatynyn, kimge qalai júginýge bolatynyn bile alasyz. Jalpy jumyspen qamtý sharalaryna tehnikalyq jáne kásibi oqytý, qysqa merzimdi oqytý, «Bastaý Biznes» jobasy, nesieleý, sáikes vakansiia tabý, jastar tájiribesi men taǵy basqa tetikter kiredi. Aqparat paidańyzǵa jarar degen senimdemiz», - deidi vitse-ministr.
