Qazaqstandyqtar sábidi maldyń qiyna jýyndyrǵan halyq emshileriniń áreketine narazylyq tanytyp jatyr. Osy áreket beinelengen sýret 4 tamyzda áleýmettik jelide taraldy. Bilim jáne ǵylym ministrligi tekserý júrgizedi.
Almatylyq turǵyn Áigerim Tórequlova qoidyń qiyna shomyldyryp jatqan balanyń sýretin Facebook paraqshasynda jariialady.
"Jalǵan dárigerler tynym tappai keledi. 180 myń oqyrmany bar áiel balany qoi qiyna shomyldyryp jatyr. Ýltradybystyq tekserý kezinde balanyń júregi toqtap qalǵany anyqtalǵan. Alaida emshi júkti áieldi sábi aman dep sendirýde. Ol shaqalaqtyń basy ornalasqan tusyn anyqtap, áieldiń ishine mai jaǵyp, kindigi arqyly júrek qaǵysyn estip bildim dep otyr. Adamgershilikten jurdai", - dep narazylyq tanytty almatylyq.
Bilim jáne ǵylym ministrligi osy jaǵdaiǵa qatysty túsinikteme berdi. Balalardyń quqyǵyn qorǵaý komiteti shara qabyldaý úshin ishki ister ministrligine resmi hat joldamaq.
Quzyrly organ ókilderi emshiniń ádisimen jalǵan emdeý balalarǵa fizikalyq jáne psihikalyq turǵydan nuqsan keltiretini týraly eskertti.
"Ókinishke qarai, ata-ananyń sengishtigi aýyr zardapqa ákelýi múmkin. Balalarynyń densaýlyǵyna, fizikalyq, psihikalyq, rýhani jáne adamgershilik damýyna qamqorlyq jasaý ata-ananyń mindeti. Ata-ana (zańdy ókilder) óz balasynyń ómiri, densaýlyǵy jáne qaýipsizdigi úshin ÁQBtK-niń 127-baby "Kámeletke tolmaǵan adamdy tárbieleý jáne (nemese) oǵan bilim berý, onyń quqyqtary men múddelerin qorǵaý jónindegi mindetterdi oryndamaý" boiynsha jaýapty bolatynyn bilýi tiis.
Sondai-aq, balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tiisinshe oryndamaǵany úshin Qylmystyq kodekstiń 141-baby boiynsha qylmystyq jaýapqa tartylýy múmkin", - dedi komitet ókilderi.
