Nur-Sultan qalasynyń eki qurylys kompaniiasyndaǵy jalaqy boiynsha bereshek 265 million teńgeni quraidy. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
«Negizgi problema - jalaqynyń ýaqtyly tólenbeýi. Qazirgi ýaqytta respýblikanyń jumys istep turǵan 39 kásipornynda jalaqy boiynsha merzimi ótken bereshek somasy 1,8 myń jumyskerge 683 million teńgeni quraidy. Elordada zań talaptaryn eskermeitin jáne 2 aidan astam ýaqyt jumysshylaryna jalaqy tólemeitin kásiporyn basshylary da kezdesedi. Bul, eń aldymen, «Shar-Qurylys» jáne «DjiElBi» JShS, jalpy qaryzy 265 mln. teńge», – dedi Birjan Nurymbetov elordanyń jekelegen kásiporyndaryndaǵy eńbek qatynastarynyń problemalyq máselelerine arnalǵan keńes barysynda.
Sonymen qatar, onyń aitýynsha, jalaqyny uzaq ýaqytqa keshiktirý faktileri «Mostostroitelnyi otriad – 25 im. Riazanova» JShS-da kóptegen janjaldyń sebebi bolyp otyr. Búgingi tańda respýblikadaǵy bul kompaniianyń jalpy bereshegi 30 million teńgeden asady. Onyń 5 million teńgesi Nur-Sultan qalasynda áli tólenbegen. Al jumyskerler osy jyldyń qyrkúieginde taǵy da narazylyq mitingisin uiymdastyrdy.
«Kelesi problemalyq másele – bankrotqa ushyraǵan kásiporyndardaǵy jalaqy boiynsha bereshek. Respýblika boiynsha 86 kásiporynda 2,3 myń jumyskerdiń aldyndaǵy qaryz 983 million teńgeni quraidy. Onyń ishinde Nur-Sultan qalasyndaǵy 4 bankrottyq kásiporynnyń 9,4 mln teńge bereshegi bar», – dedi ministr.
Birjan Nurymbetov qoǵamdaǵy áleýmettik shielenistiń aldyn alýǵa da nazar aýdardy.
«Jyl basynan beri respýblikada eńbek janjaldarynyń 3 faktisi tirkeldi. «Abý-Dabi Plaza» qurylys kesheni qurylystaǵy qazaqstandyq jáne sheteldik jumysshylardyń arasyndaǵy únemi týyndaǵan qaqtyǵystardyń turaqty shielenis kózi bolyp otyr. Tek osy jyldyń ózinde atalǵan mekemede 4 janjal oryn alǵan. Biraq olar turmystyq jáne ultaralyq sipatta boldy. Olardyń sebebi jergilikti jáne sheteldik qyzmetkerlerdiń eńbek jaǵdaiynyń ártúrli bolýynda», – dedi ministr.
Sondai-aq, ol QR Eńbek jáne halyqty áleýmettik qorǵaý ministrligi Bas prokýratýramen birlesip sheteldik jumys kúshin tartatyn 63 kásiporynda (tekserý júrgizýge) bastamashylyq etkenin atap ótti. 38 kásiporynda tekserý aiaqtaldy, onyń ishinde 19-da eńbekaqy tóleýdegi sáikessizdiktiń 161 faktisi anyqtaldy.
«Tekserý nátijeleri kórsetkendei, Nur Sultan qalasynda Arabtec CCL filialynda jergilikti jáne sheteldik jumyskerlerdi tamaqtandyrý kezinde teńsiz jaǵdailar faktileri anyqtaldy. Jataqhanada turatyn sheteldik jumyskerlerge kúnine 3 ret as beriledi, onyń quny 2-den 3 myń teńgege deiin, al jergilikti qyzmetkerler bólek tamaqtanady. Olarǵa tek 800 teńge mólsherinde ótemaqylyq tólem beriledi. Sonymen qatar, jumys berýshilerdiń berilgen ruqsatqa sáikes kelmeitin laýazymdarǵa sheteldik jumyskerlerdi tartý faktileri, sondai-aq qazaqstandyq kadrlardy qamtý talaptarynyń saqtalmaý faktileri anyqtaldy. Tekserý nátijeleri boiynsha memlekettik eńbek inspektorlary tarapynan nusqama berildi», – dedi B.Nurymbetov.
Ministr sheteldik jumys kúshine bailanysty buzýshylyqtardyń turaqty anyqtalýyna bailanysty QR Eńbek ministrligi kvotalardy qysqartý boiynsha sharalar qabyldap, sheteldik mamandardy tartýǵa ruqsat berý erejesin kúsheitýdi josparlap otyrǵanyn atap ótti.
