Elordalyq politsiia qyzmetkerleri aiaǵy aýyr áieldi blokbeketten jedel túrde perzenthanaǵa jetkizdi. Bul týraly "Ult aqparat" Polisia.kz saityna silteme jasap habarlaidy.
Málim bolǵandai, onyń kenetten tolǵaǵy bastalǵan.
«Búgin túnde Qosshydaǵy blok beketke ishinde aiaǵy aýyr áiel otyrǵan kólik keldi. Bekettegi Rústem Bolatov bosanatyn áieldi patrýldik kólikke otyrǵyzyp, perzenthanaǵa jetkizip salý týraly jedel sheshim qabyldaǵan. Osy ýaqytta bekette kezekshi bolǵan Jol-patrýldik politsiiasynyń mamandandyrylǵan batalony qyzmetiniń inspektory Erlan Isaev aiaǵy aýyr áieldi politsiia kóligine otyrǵyzýǵa kómektesti», - delingen aqparatta.
Politsei áieldi 10 minýt ishinde Rysqulbekov kóshesinde ornalasqan perzenthanaǵa jetkizgen. Ol perzenthanaǵa aldyn ala habarlasyp, jaǵdaidy túsindirip aitqan. Dárigerler áieldi kútip otyrǵan.
«Jolda ýaiymdadyq. Ár sát biz úshin qymbat boldy. Men ómirimde birinshi ret osyndai jaǵdaiǵa tap boldym. Jol boiy áielmen sóilesip, ony tynyshtandyrýǵa kómektestim», - deidi Erlan Isaev.
37 jastaǵy áieldiń jetinshi sábiine aiaǵy aýyr. Onyń tórt uly, eki qyzy bar. Ol ýaqytyly kórsetilgen kómek úshin politsiia qyzmetkerlerine alǵys aitty.
Erlan Isaevtyń ózi bes balanyń ákesi ekenin aita ketý kerek. Bári oidaǵydai ekenine kóz jetkizgen politsiia qyzmetkerleri qyzmettik mindetterin odan ary atqarýǵa kiristi.
