Elordadaǵy Jekpe-jek saraiyna dańqty balýan Jaqsylyq Úshkempirov esimi berildi. Bul týraly QR Prezidentiniń baspasóz hatshysy Berik Ýáli Instagram paraqshasynda jazdy, dep habarlaidy "Ult aqparat".
«Memleket basshysy Qasym-Jomart Kemelulynyń tikelei bastamasymen ári qoldaýymen Elordamyzdaǵy Jekpe-jek saraiy resmi túrde dańqty balýan, Olimpiada chempiony Jaqsylyq Úshkempirov aǵamyzdyń esimimen atalatyn boldy. Bul sheshim bylai qabyldanǵan edi... Osydan birneshe jyl buryn osy Jekpe-jek ortalyǵynyń irgetasy qalanyp jatqanda Jaqsylyq aǵamyz úlken uly Jandospen birge qurylys bastalǵaly jatqan jerdiń janynan ótip bara jatady. Endi ǵana qazyǵy qaǵylyp jatqan jerge qarap: «Osy qazaqqa, qazaqtyń sportyna, qazaqtyń kúresine bir kisidei-aq eńbek sińirdim dep oilaimyn. Ásirese, Odaqtyń dańqy dáýirlep, bizdiń ulttyń ókilderiniń báige almaq túgil, ózgemen teń turýynyń ózi muń bolyp turǵan shaqta Olimpiadanyń júldesin julyp aldym. Onymdy búgingi qazaqqa mindet qylmaimyn, árine. Ol kezde jastyqtyń býymen bilinbegen de eken. Qazir oilaimyn, áli kúnge ózimniń izimdi basatyn jigitterdiń shyqpaǵanyna qaraǵanda, sol 80-degi Olimpiada maǵan da ońaiǵa soqpaǵan eken-aý dep. Endi bir armanym bar, shirkin osy Jekpe-jek ortalyǵynyń qurylysy bitip, meniń atymdy berse ǵoi, arman joq edi-aý» degen eken. Jandos: «Oi áke-ai, bul qai ýaqytta salynyp bitedi deisiz? Oǵan deiin kim bar, kim joq? Qandai sheshim qabyldanady? Bilmeimiz ǵoi...» dep qoia salady», - dep jazdy Berik Ýáli.
Onyń atap ótýinshe, Jaqsylyq aǵamyz baqilyq bolyp ketkennen keiin joǵarydaǵy áńgime Memleket basshysyna jetedi. Qasym-Jomart Toqaev birden qoldaidy. Tiisti oryndarǵa tapsyrma beredi.
«Sóitip, kúni keshe ǵana Úkimettiń resmi qaýlysy shyqty. Jekpe-jek saraiy resmi túrde Jaqsylyq Úshkempirov aǵamyzdyń atymen atalatyn boldy. Balýan aǵamyzdyń arýaǵy razy bolsyn! «Er esimi, el esinde» degen osy!», - dedi Prezidenttiń baspasóz hatshysy.
Esterińizge sala ketsek, Nur-Sultan qalasyndaǵy «Jekpe-jek» saraiyna Olimpiada chempiony Jaqsylyq Úshkempirovtiń esimin berdi kózdegen Úkimet qaýlysynyń jobasy osy jyldyń qyrkúiek aiynda «Ashyq úkimet» portalynda qoǵam talqylaýyna usynylǵan bolatyn.
Sonymen qatar dańqty palýan dúniege kelgen Jambyl oblysynda da «Taraz-Arena» sport keshenine onyń esimin berý usynylǵan. Jambyl oblysy ákimdigi men máslihatynyń birlesken usynysy óńir máslihatynyń kezekten tys otyrysynda maquldanǵan. Usynys Respýblikalyq onomastika komissiianyń qaraýyna joldanǵan.
Grek-rim kúresinen tuńǵysh Olimpiada chempiony, Álem chempiony, Qazaqstannyń eńbek eri, «Barys», «Qurmet» «Parasat» ordenderiniń iegeri Úshkempirov Jaqsylyq Ámiráliuly 1951 jyly 6 mamyrda Qazaq KSR, Jambyl oblysy, Sverdlovsk aýdany, Chapaev keńsharynda dúniege kelgen. Biylǵy 2 tamyzda mezgilsiz ómirden ótti.
