Elordadaǵy Táýelsizdik saraiynda top-deńgeidegi gimnastika ortalyǵy ashylady. Bul týraly «Astana Venue Management» JShS-nyń bas direktory Málik Hasenov aitty dep habarlaidy QazAqparat.
«Buǵan deiin Táýelsizdik saraiy iri is-sharalarǵa – forýmdar, kórmelerge, halyqaralyq delegatsiialardyń jáne Memleket basshysy qatysatyn is-sharalarǵa jalǵa berý esebinen qyzmet kórsetip kelgen bolatyn. Qazirgi ýaqytta 2008 jyly salynǵan Táýelsizdik saraiynan bólek «EKSPO» halyqaralyq kórme ortalyǵy, «EKSPO» kongress ortalyǵy jumys isteidi. Olar «QazExpoCongress» kompaniiasyna tiesili», - dedi ol Nur-Sultan qalalyq máslihatynyń áleýmettik-mádeni damý máseleleri jónindegi komissiiasynyń otyrysynda.
Onyń atap ótýinshe, osy ýaqytqa deiin Táýelsizdik saraiynda uiymdastyrylatyn 20 is-shara endigi ýaqytta «EKSPO» aýmaǵynda ótedi.
«Qalǵany 2 negizgi is-shara ǵana. Biraq, soǵan bola 38 myń sharshy metrdi bos ustap otyrý maqsatqa sai kelmeidi dep sheshtik. Táýelsizdik saraiynda balalar úshin sarai ashý tujyrymdamasy usynyldy. Aitalyq, ol jerde aýmaǵy 4,3 myń sharshy metrdi quraityn Kongress-zaly bar. Tóbesiniń biiktigi 14 metrdi quraidy. Sondyqtan qalalyq sport basqarmasymen birge sol jerde top-deńgeidegi gimnastika ortalyǵyn qurý sheshimi qabyldandy. Bul oraida ǵimarat infraqurylymy búlinbeidi jáne buqaralyq sport 3 esege artatyn bolady», - dedi Málik Hasenov.
