Kópshilikti mazalap, jurtshylyqty tolǵandyrǵan Kishi Taldykól taǵdyryna qatysty Nur-Sultan qalasynyń ákimdigi taǵy bir ret resmi túsinikteme berdi, dep habarlaidy QazAqparat.
«Áńgimeni Taldykól kóli men sýly-batpaqty Kishi Taldykólmen shatastyrmaý kerektiginen bastaǵym kelip tur. Elordanyń bas josparyna sáikes, qalanyń shyǵysynda ornalasqan Taldykól kóliniń boiynda kópqabatty turǵyn úi salý josparlanyp otyr. Árine turǵyn úiden bólek, mektep, balabaqsha, emhana jáne basqa da áleýmettik nysandar turǵyzylmaq. Osy tusta aitarym, kóldiń ózine tiispeimiz, kerisinshe onyń mańyna úi salyp, infraqurylymdy damytamyz. Sol siiaqty batpaqty las sýdy tazartýdy kóldi joiý dep túsinetin sekildi. Bizde kóldi joiý maqsaty joq, kerisinshe onyń las batpaqtan tazartyp, saqtap qalmaqpyz. Sebebi ekologiialyq kórsetkishter boiynsha onyń sýly-batpaǵy las ári ziian»,- dedi Nur-Sultan qalasy sáýlet, qala qurylysy jáne jer qatynastary basqarmasynyń basshysy Nurlan Uranhaev elorda ákimdiginde ótken baspasóz máslihatynda.
Onyń aitýynsha, qazirgi tańda Kishi Taldykóldi zaiiandy zattardan tazartýǵa daiyndyq jumysy júrip jatyr.
«Kishi Taldykól - baiaǵydan batpaqty jer. Onyń aýmaǵyna Tselinograd kezinde káriz qaldyqtaryn tastaǵan. Ekolog retinde aitarym, qalanyń ishinde nemese jaqyn jerde jaǵymsyz iisi bar obekt bolmaýy kerek. Bul týraly BUU-nyń da tiisti standarty bar. Bul jerde qala ákimdigi kóldi saqtap qalýdyń qamyn jasap jatyr. Iaǵni, turǵyn úidi salýshy kompaniiaǵa kóldi tazartyp, saqtap qalý talabyn qoiyp otyr. Jasandy bassein bolmaq, onyń aýmaǵy - 20 gektar. Onyń ústine mańynda saiabaq bolady. Eger rasymen kól tazartylyp, saqtalyp qana qoimai, ondaǵy infraqurylym rettelse, bul - sol kóldiń bolashaǵy úshin kúresken ekologtardyń jeńisi dep bilemin», - deidi «Baitaq bolashaq» respýblikalyq qoǵamdyq birlestiginiń prezidenti Azamathan Ámirtai.
