Nur-Sultanda belgili balýan, Olimpiada chempiony Jaqsylyq Úshkempirovke arnalǵan eskertkish ashyldy, - dep habarlaidy "Ult aqparat".
Eskertkish sportshy qurmetine Jekpe-jek saraiy aýmaǵynda, iaǵni Qabanbai batyr dańǵyly men Kerei, Jánibek handar kósheleriniń qiylysynda ornalasqan.
Ashylý saltanatyna Mádeniet jáne sport ministri Aqtoty Raiymqulova men Nur-Sultan qalasy ákiminiń orynbasary Ashat Oralov, bokstan Olimpiada oiyndarynyń jeńimpazy Daniiar Eleýsinov arnaiy qatysty.
Aita keteiik, jekpe-jek saraiy 2019 jyldyń 6 shildesinde ashylǵan. Bes myń kórermenge arnalǵan sport ǵimaratynda boks, kúres, dziýdo, aýyr atletika jáne basqa da olimpiadalyq, sondai-aq Olimpiadaǵa kirmeitin sport túrleri boiynsha halyqaralyq jarystar ótkizýge bolady. 2020 jyldyń jeltoqsanynda oǵan Jaqsylyq Úshkempirovtiń esimi berilgen.
Jaqsylyq Ámiráliuly Úshkempirov - sport sheberi (1971), Halyqaralyq dárejedegi sport sheberi (1975), KSRO-nyń eńbek sińirgen sport sheberi (1980), altyn medal ielengen qazaqtan shyqqan tuńǵysh Olimpiada chempiony (Máskeý, 1980), Álem chempiony (1981), álem kýbogynyń kúmis júldegeri (1982), eki dúrkin Keńes Odaǵynyń chempiony (1975, 1980), Qazaq KSR eńbek sińirgen jattyqtyrýshysy.
«Qurmet belgisi» ordeniniń iegeri.
