Elordada Táýelsizdik kúni merekesi qarsańynda qazaq ádebietiniń alyptary Sáken Seifýllin, Iliias Jansúgirov jáne Beiimbet Mailinge eskertkish ornatyldy. Bul týraly qala ákimi Altai Kólginov Facebook-tegi paraqshasynda málim etti, dep habarlaidy "Ult aqparat".
Aita keteiik, biyl Úsh arystyń týǵanyna 125 jyl tolyp otyr.
«Ultymyzdyń tar jol taiǵaq keshken jyldaryn romanynyń ataýymen astarlap jetkizip, qazaq ataýyn qujat júzinde qaitarǵan Sáken Seifýllin murasynyń bizdiń rýhaniiatymyzda alatyn orny erekshe. Búginde qalamyzda mýzeii jumys isteidi. Endi mine eskertkishi ashylyp otyr.
Beiimbet Mailin óziniń jazýshylyǵymen qatar, eldi saýattylyqqa úndep, alǵashqy «Qazaq» gazetine, «Aiqap» jýrnalyna jáne basqa da basylymdarǵa turaqty máselelerdi jazǵan jýrnalistigimen de kóp eńbek sińirdi. Dramatýrgtyǵy bir tóbe. Áńgimeleri áli kúnge deiin ózektiligin joimai, jas urpaqty tárbieleý máselesinde paidalanylyp keledi. Iliias Jansúgirov – qazaq folkloryn damytqan tulǵa. «Kúishi», «Qulager» poemalary – tunǵan tarih. «Uly dalanyń jeti qyry» atty maqaladaǵy keleli oilardyń negizinde dúniege kelgen bul týyndyny kóptiń qýanyshy dep bilemin. Bul eskertkish ótkenge qurmet qana emes, tarihymyzǵa qoiylǵan biregei belgi, bolashaqqa degen kámil senim. Azat eldiń astanasy – Nur-Sultan qalasynyń tórinde taǵdyry da bir, ómiri de uqsas ultymyzdyń Uly perzentterine arnalǵan eskertkishtiń turýy – zańdylyq. Jas urpaqqa úlgi-ónege bolady degen úmittemin», - dedi A.Kólginov.
Búgin sondai-aq qalada Jazýshylar úii ashyldy.
Atalmysh sharalarǵa Jazýshylar odaǵynyń tóraǵasy Ulyqbek Esdáýlet, aqyn-jazýshylar Marfýǵa Aitqojina, Ánes Sarai, Nesipbek Aituly, Jazýshylar odaǵy qalalyq filialynyń tóraǵasy Dáýletkerei Kápuly, sondai-aq jas qalamgerler qatysty.
