Elordada úlken kóshege Ál-Farabi aty berilip, záýlim eskertkishi ornatylady. Bul týraly Ál-Farabidiń 1150 jyldyq mereitoiyn daiyndaý jáne ótkizý jónindegi memlekettik komissiia otyrysynda QR Premer-Ministriniń orynbasary Berdibek Saparbaev aitty, dep habarlaidy "Ult aqparat".
«Qazir Nur-Sultan qalasy ákimshiligimen jumys istep jatyrmyz. Bizdiń josparymyz boiynsha osy jaqynda, jeltoqsan aiynda Nur-Sultanda Ál-Farabi atyndaǵy kóshe bolady. Respýblikalyq oqýshylar saraiyna Ál-Farabidiń aty beriledi. Oǵan qosymsha demeýshilerdi tartý arqyly elorda Ál-Farabige eskertkish ornatylady», - dedi Úkimet basshysynyń orynbasary.
Osy oraida Berdibek Saparbaev elimizdiń Syrtqy ister ministrligine Damaskidegi Ál-Farabi ortalyǵyn qaita qolǵa alýdy ótindi.
«Jóndeý jumystary qajet bolsa, solardy júrgizý qajet. Onyń ústine Syrtqy ister ministri Muhtar Tileýberdi sol jerde (Damaskide) Qazaqstannyń konsýldyǵynyń ashylatyndyǵyn aitqan edi. Bizdiń ótinishimiz, sol konsýldyq negizinde bir úlken ǵylymi-tájiribelik konferentsiia ótkizsek. Ol konferentsiiaǵa kórshi memleketterdiń farabitanýshylaryn shaqyrsaq. Sol arqyly Ál-Farabidi taǵy bir úlken halyqaralyq dárejege kóterer edik», - dedi ol.
