Politseilerden, ákimdik pen Sanitariia-epidemiologiialyq baqylaý basqarmasynyń ókilderinen turatyn mobildi top karantin rejimin buzýshylardy anyqtap jatyr, dep habarlaidy "Ult aqparat" Nur-Sultan qalasynyń PD baspasóz qyzmetine silteme jasap.
Nur-Sultannyń «qoiý qyzyl aimaqqa» ótýine bailanysty infektsiianyń taralýyn boldyrmaý boiynsha shekteý sharalary qabyldandy. Saltanatty, otbasylyq jáne basqa da buqaralyq sharalardy ótkizýge tyiym salyndy.
Demalys kúnderi mobildi top 155 kásipkerlik nysanyn tekserip, 40 karantin buzýshyny anyqtady.
Degenmen, salynǵan tyiymǵa qaramastan, azamattar qoldanystaǵy qaýlyny elemei otyr. Mysaly, Aqan seri kóshesindegi «Arna» meiramhanasynyń banket zalynda toi ótken. Onda kelgen 200 qonaq karantin sharalaryn saqtamai, emin-erkin kóńil kótergen. Mobildi top tekserýge kelgende toi qyzyp jatqan.
Osy kúni «Shatush» meiramhanasynyń banket zaly da qonaqtarǵa toly boldy. Onda 150 qonaq kóńil kótergen. Arasynda qarttar men balalar da bolǵan.
Meiramhana qojaiyndaryna qatysty jinalǵan material QR ÁQBtK-niń 425-baby boiynsha ákimshilik óndiris qozǵaý úshin ókiletti organǵa jiberildi.
Nur-Sultan qalasynyń Politsiia departamenti kásipkerlerdi karantin sharalardy buzǵan jaǵdaida jaýapqa tartylatynyn jáne kásiporyn jumysynyń toqtatylatynyn eske salyp, sanitariia erejelerin saqtaýǵa shaqyrady. Politseiler turǵyndardy buqaralyq sharalarǵa barmai, otbasylyq otyrystardan bas tartýǵa keńes beredi.
