2019 jyldyń 7 aiynda óndiriste jaraqattaný ótken jyldyń sáikes kezeńimen salystyrǵanda 11 paiyzǵa tómendedi.
Bul týraly elordanyń jekelegen kásiporyndaryndaǵy eńbek qatynastarynyń problemalyq máselelerine arnalǵan keńes barysynda QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
«Aǵymdaǵy jylǵy 1 tamyzdaǵy jaǵdai boiynsha el kásiporyndarynda 749 adam zardap shekti. Bul ótken jyldyń sáikes kezeńinen 11 paiyzǵa tómen. Alaida Nur-Sultan qalasynda óndiristik jaraqat alý kórsetkishi aitarlyqtai ósip otyr», – dedi B.Nurymbetov.
Ministrdiń dereginshe, 2019 jyly qala kásiporyndarynda 34 qyzmetker zardap shegip, onyń ishinde 7 adam qaza tapqan. Bul ótken jyldyń sáikes kezeńimen salystyrǵanda 70 paiyzǵa artyq.
«Bul eń aldymen 23 mamyrda «Astana Sý Arnasy» MKK-de oryn alǵan, 4 adam qaitys bolyp, 1 adam qatty ýlanǵan toptyq jazataiym oqiǵaǵa bailanysty. Tergeý nátijeleri boiynsha jazataiym oqiǵanyń negizgi sebebi káriz ishindegi aýa taldaýynyń gaztaldaǵyshpen júrgizilmegeni, qyzmetkerlerge gazqaǵarlardyń berilmegeni, sondai-aq, nariad-ruqsatnama bermei jumysqa jiberilgeni anyqtaldy. Osy sebepterge súiene otyryp, jumys berýshi laýazymdy tulǵalardyń kinási 100 paiyz dáleldendi» – dedi ol.
Keńesti qorytyndylai kele, Birjan Nurymbetov elorda ákimdigine 2019 – 2023 jyldarǵa arnalǵan eńbek janjaldaryn boldyrmaý jónindegi keshendi is-sharalar josparynyń jáne óndiristik jaraqattanýdy tómendetý jónindegi jol kartasynyń oryndalýyn qamtamasyz etý jóninde sharalar qabyldaýdy; jalaqy, óndiristik jaraqattaný, eńbek janjaldary boiynsha bereshektiń sebepterine turaqty negizde taldaý júrgizýdi jáne olardy joiý jóninde ýaqtyly sharalar qabyldaýdy; jumys berýshilerdiń eńbekaqy boiynsha bereshekterdi joiý jóninde naqty josparlar jasaýdy; óndiristik táýekeldiń joǵary deńgeii bar árbir kásiporynda qaýipsiz eńbek jaǵdailaryn qamtamasyz etý jónindegi is-sharalar josparyn bekitýdi usyndy.
