Elorda ákimi Altai Kólginov Prezidenttiń halyqqa Joldaýyn talqylaý boiynsha qala aktiviniń kezdesýin ótkizdi, dep habarlaidy QazAqparat.
«Memleket basshysy azamattyq qoǵam institýttaryn, onyń ishinde Ulttyq qoǵamdyq senim keńesin damytýdyń mańyzdy ekenin aitty. Bizge de qalalyq Qoǵamdyq keńespen ózara bailanysty kúsheitý qajet. Jaqynda ǵana 16 turǵyn úi alabyn damytý boiynsha qoǵamdyq tyńdaýlar ótkizdik. Turǵyndardyń barlyq shaǵym-eskertpelerin tyńdap, negizgi máselelerdi josparǵa engizdik. Prezident pikir alýandyǵy men ashyqtyqty damytýǵa, beibit pikir bildirgen azamattardyń quqyǵyn qorǵaýǵa úlken mán berip otyr. Qala máslihatynyń sheshimimen ruqsat berilgen beibit mitingter ótkizýge eki arnaiy oryn bólingen. Biraq, kez kelgen zańbuzýshylyq pen tártipti buzýdyń joly kesiledi. Bizdiń mindetimiz - turǵyndardyń tynyshtyǵyn qamtamasyz etý. Jáne biz memleket ókili retinde azamattarymyzdyń múddesin qorǵaimyz. Biryńǵai azamattyq qundylyqtardy engizý, konfessiiaaralyq, etnikaaralyq kelisim men ózara qurmetti arttyrý jumystaryn kúsheitýimiz qajet», - dedi Altai Kólginov.
Ákimniń aitýynsha, elordada 130-dan astam ult ókilderi turady jáne 23 etnomádeni birlestik jumys isteidi.
«Bul mádeni bailyqty saqtaý kerek. Sonymen birge, memlekettik tilimizdiń rólin arttyrý mańyzdy. Ol úshin turǵyndar tilimizdi tereńirek zerdelep, kúndelikti qoldanǵany jón», - dedi A. Kólginov.
