Elordadaǵy Abai kóshesiniń boiynda qalamgerler alleiasy ashylady. QR Premer-Ministriniń orynbasary Berdibek Saparbaev ziialy qaýym ókilderimen kezdesýinde osyndai jaǵymdy jańalyqty jetkizdi.
«Aziia qalamgerleriniń forýmyna elge belgili aqyn-jazýshylarymyzdyń barlyǵy qatysyp jatqanyn paidalanyp, ózderińizben eldik máseleler boiynsha pikir almassaq dep kezdesip otyrmyz. Forýmǵa memleket basshysynyń ózi qatysyp, qurlyq jazýshylarynyń arasynda «Aziia alyby» atty ádebi syilyqty taǵaiyndaý jóninde, Aziia qalamgerleriniń ortaq kitaphanasyn ashý týraly usynystar aitty. Ony sizder de qoldaidy dep oilaimyz», - degen bastaǵan Vitse-Premer elorda tórinen qalamgerler alleiasy ashylatynyn aitty.
«Nur-Sultan qalasynda jazýshylar odaǵynyń ortalyq filialyn ashý josparlanyp otyr. Qazir halyq pen bilik arasyndaǵy dialogqa kóp kóńil bólinip otyr. Kino týraly zań qabyldanǵanyn bilesizder. Taǵy bir másele – qazaq ádebietiniń jaýharlaryn basqa tilderge aýdarý. Ulttyq aýdarma biýrosynyń jumys istep turǵanynan habardar shyǵarsyzdar. Qazaq qalamgerleriniń shyǵarmalary BUU-nyń tiline aýdarylatynyn da estip otyrsyzdar. Áleýmettik jeliden kórip otyrsyzdar. Qazir bárimizdi tolǵandyryp júrgen eń úlken másele – ulttyq qundylyqtarymyz, tárbie, otbasy máselesi. Sońǵy kezde kóp kóterilip júrgen másele – eńbekke baýlý. Bárimizdi áke-sheshemiz eńbekke tárbieledi. Masyldyq degen beleń alyp bara jatqan siiaqty. Masyldyq pen muqtajdyqty ajyrata bilýimiz kerek. Osy turǵyda aitar oilaryńyz bolsa, eskerilsin dep Aqparat jáne qoǵamdyq damý ministrin, Bilim jáne ǵylym ministrin, Mádeniet jáne sport ministriniń orynbasaryn aldaryńyzǵa alyp keldik», - dedi Berdibek Saparbaev.
Atalmysh kezdesý aiasynda shyǵarmashyl ziialy qaýymnyń Qazaqstan Respýblikasy Prezidenti Qasym-Jomart Toqaevtyń «Syndarly qoǵamdyq dialog – Qazaqstannyń turaqtylyǵy men órkendeýiniń negizi» atty halyqqa joldaýyn iske asyrýdaǵy róli taqyryby talqylandy.
Memleket jáne qoǵam qairatkeri Myrzatai Joldasbekov, Qazaqstan Jazýshylar Odaǵy basqarmasynyń tóraǵasy Ulyqbek Esdáýlet, tiltanýshy, Qazaqstannyń Eńbek Eri Oljas Súleimenov, jazýshy dramatýrg Dýlat Isabekov, Qazaqstannyń eńbek sińirgen qairatkeri Tólen Ábdik, «Qurmet» ordeniniń iegeri Beksultan Nurjekeev, aqyn Aqushtap Baqtygereeva, aqyn Esenǵali Raýshanov pen Tynyshtyqbek Ábdikákimuly siiaqty tanymal ádebiet ókilderi qatysty. Kezdesýde ziialy qaýym ókilderi eldiń áleýmettik ahýaly men saiasi reformalar týraly sóz qozǵady.
