Nur-Sultan qalasynda ornatylǵan beine-baqylaý quraldarynyń arqasynda qaladaǵy qylmys kórsetkishi 40%-ǵa tómendegen. Bul týraly Nur-Sultan qalasy ákiminiń orynbasary Malika Bekturova aitty.
Bas qaladaǵy tsifrlandyrý jumystary nátijesinde ákimshilik quqyqbuzýshylyq, jol qozǵalysy erejesin buzý men túrli qylmystardyń (qaraqshylyq, urlyq jasaý, tonaý, t.b.) aldyn-alý jáne olardy anyqtaý protsesi ońtailana bastady.
«Alǵashqy ýaqytta qala kóshelerindegi beine-baqylaý júiesin kóp adam túsinbei, aiyppul salý júiesi dep qabyldady. Shynyn aitqanda, atalǵan júie qala turǵyndarynyń qaýipsizdigin qamtamasyz etý úshin jasalǵan bolatyn. Nátijesinde Nur-Sultan qalasyndaǵy qylmys sany 40 paiyzǵa azaidy. Munyń barlyǵy tsifrlandyrýdyń oń nátijesi. Tsifrlandyrýdaǵy basty maqsat – ómir sapasyn jaqsartý, jeńildetý», – deidi Nur-Sultan qalasy ákiminiń orynbasary Malika Bekturova.
Qala ákimi orynbasarynyń sózinshe, jýyrda elordadaǵy beine-baqylaý júiesine soft engiziledi. Mundaǵy maqsat – joǵalǵan, izdeýde júrgen adamdardy taýyp, qala qaýipsizdigin qamtamasyz etý jáne quqyq buzýshylyqtardyń aldyn alý.
Aita ketsek, «Tsifrlyq Qazaqstan» memlekettik baǵdarlamasy aiasynda Nur-Sultan qalasyn «aqyldy qalaǵa» ainaldyrý jumystary qolǵa alynǵan bolatyn. Osyǵan bailanysty, el astanasynda qarqyndy jumystar júrgizilip jatyr. Búginde tsifrlandyrý jumystary emhanalardaǵy kezek kútýshiler sanyn azaitýǵa, qyzmet sapasyn arttyrýǵa óz úlesin qosýda. Osy rette, Smart Astana mobildi qosymshasy iske qosylyp, 70-ten astam qyzmet túri elektrondy nusqada beriledi. Atap aitsaq, dáriger qabyldaýyna jazylýǵa, ony úige shaqyrtýǵa, salyqtyq mártebeni bilýge, eńbekke jaramsyzdyq qaǵazynyń «shynaiylyǵyn» tekserýge, tsifrlyq saýattylyqty arttyrýǵa, qaiyrymdylyq qoryna aqsha aýdarýǵa, biryńǵai jiyntyq tólem jasaýǵa jáne t.b. qyzmetterdi júzege asyrýǵa bolady.
