Qazaqstanda Belarýs respýblikasynyń mádeniet kúnderi bastaldy, dep habarlaidy QazAqparat.
Aitýly is-shara Belarýs kinosy kúnderiniń saltanatty ashylýymen bastaý aldy.
Aldaǵy 3 kún boiy elorda jurtshylyǵy «Kerýen» oiyn-saýyq jáne saýda ortalyǵyndaǵy kinoteatrdan belarýs filmderin tegin tamashalai alady.
Kino kúnderiniń shymyldyǵy rejisser Dmitrii Astrahannyń «Sýdba diversanta» filmimen ashyldy. Jáne kino kúnderi aiasynda 10-nan astam film kórsetilmek.
«Eki el arasyndaǵy yntymaqtastyq qarym-qatynastyń irgesi berik. Sonyń ishinde mádeni qarym-qatynas ta bar. Qazaqstan Belarýste ótetin iri mádeni-aǵartý is-sharalaryna belsene qatysyp keledi. Sonyń biregeii Belarýs elinde dástúrli túrde ótetin halyqaralyq kitap kórmesi, «Slavian bazary» halyqaralyq mýzykalyq óner festivali, Minskide ótetin «Listopad» halyqaralyq kinofestivali jáne taǵys basqa. Biyl «Listopad» halyqaralyq kinofestivali aiasynda belarýs jurtshylyǵy nazaryna birneshe otandyq film usynyldy. Odan bólek, bizde memleketten biýdjetten Belarýs elimen birlesip film túsirýge qarjy qarastyrylǵan», - dedi QR Mádeniet jáne sport ministriniń orynbasary Nurǵisa Dáýeshov mádeni sharanyń ashylý saltanatynda.
Sondai-aq, vitse-ministr astanalyqtardy Belarýs eliniń mádeniet kúnderi aiasynda ótetin sharalarǵa qatysýǵa shaqyryp, atalǵan ulttyń mádenietimen jaqynyraq tanysýǵa keńes berdi.
«Dástúrge sai Qazaqstanda Belarýs Respýblikasynyń mádeniet kúnderin ashyq dep jariialaimyz. Eń alǵash ret 2013 jyly bizdiń elde Qazaqstannyń mádeniet kúnderi atalyp ótildi. Sodan beri jyl saiyn eki elde mádeniet kúnderi turaqty túrde ótip keledi. Ókinishke qarai, ótken jyly pandemiiaǵa bailanysty atalǵan mádeni shara uiymdastyrylmady. Nur-Sultan qalasyndaǵy mádeniet kúnderin otandyq filmderimizdi usynýdan bastaimyz. Qazaqstandyq kórermenderge tarihi, kórkem jáne animatsiialyq filmder kórsetiletin bolady. Kinotýyndylar qazaqstandyqtardyń kóńilinen shyǵady dep oilaimyz. Sol siiaqty filmderdi tamashalaý arqyly belarýs halqyn jaqynyraq tani alasyzdar degen úmittemin», - dedi Qazaqstandaǵy Belarýs Respýblikasynyń Tótenshe jáne Ókiletti elshisi Pavel Ýtiýpin atalǵan sharada.
Odan bólek, elshiniń aitýynsha, erteń Ulttyq mýzeide «Qazirgi Belarýs jas sýretshilerdiń kózimen» atty kartina kórmesin ashý josparlanyp otyr.
Sonymen qatar, erteń keshke «Qazaqstan» kontsert zalynda merekelik kontsert ótedi.
