Elorda politsiiasyna balalar arbasynyń urlaný faktisimen jergilikti turǵyn shaǵymdandy. Onyń aitýynsha, quny 45 myń teńge turatyn arba kireberistegi baspaldaq astynda turǵan, dep habarlaidy "Ult aqparat" Nur-Sultan qalasy Politsiia departamentiniń baspasóz qyzmetine silteme jasap.
Saryarqa aýdandyq politsiia basqarmasy qyzmetkerleriniń jedel-izdeý sharalaryn ótkizý kezinde kúdikti áiel anyqtalyp, ustaldy.
Politsiia bólimshesine jetkizilgen 27 jastaǵy áiel óz kinásin moiyndady.
Ol úidiń janynan ótip bara jatqanda kireberistiń ashyq turǵan esiginen baspaldaqtyń astyndaǵy balalar arbalary men velosipedterdi kórgen. Áiel múmkindikti paidalana otyryp, arbalardyń birin balasyna urlap áketken.
Politsiia qyzmetkerleri urlanǵan zatty tárkilep, iesine qaitardy.
Atalǵan faktimen sot aldyndaǵy tergeý jumysy júrip jatyr.
Ustalǵan áieldiń buryn jasalǵan osyǵan uqsas qylmystarǵa qatysy bar-joǵy anyqtalýda.
Nur-Sultan qalasynyń politsiia departamenti turǵyndarǵa qyraǵy bolyp, baǵaly zattaryn qaraýsyz qaldyrmaýyn suraidy.
