Elordada 10 mln arhiv qujatyn saqtaityn qoima salý kerek. Bul týraly QR Prezidenti janyndaǵy Adam quqyqtary jónindegi komissiia otyrysynda Mádeniet jáne sport ministri Aqtoty Raiymqulova aitty, dep habarlaidy QazAqparat.
«Nur-Sultan qalasynda QR Ulttyq arhiviniń arhiv qujattaryn, sondai-aq memlekettik saqtandyrý qory qujattarynyń kóshirmelerin saqtaýdy júzege asyratyn, 10 mln qujat saqtaýǵa arnalǵan jeke arhiv qoimasyn salý máselesi qaraýdy talap etedi»,- dedi ol.
Onyń atap ótýinshe, arhivterdiń júktelý problemasyn sheshý maqsatynda Mádeniet jáne sport ministrligi 2020 jylǵy jeltoqsanda qurylys jáne turǵyn úi-kommýnaldyq sharýashylyq komitetine 200, 500 myń, 1 mln jáne 1,5 mln saqtaý birligine arnalǵan memlekettik arhivtik úlgilik ǵimarattarynyń jobalyq-smetalyq qujattamasyn ázirleýge ótinim bergen.
«Óz kezeginde Indýstriia jáne infraqurylymdyq damý ministrligi 2021 jylǵy 11 naýryzda Mádeniet jáne sport ministrliginiń ótinimi negizinde memlekettik arhivter ǵimarattarynyń úlgilik jobalaryn ázirleý úshin 2022-2024 jyldarǵa arnalǵan biýdjettik ótinim qalyptastyrdy. Respýblikalyq biýdjettik komissiia ótinimdi maquldaǵan jaǵdaida Indýstriia jáne infraqurylymdyq damý ministrligi 2022 jyly zańnyń belgilengen talaptaryna sáikes arhiv ǵimaratynyń úlgilik jobalaryn ázirleýge daiyn», - dedi Aqtoty Raiymqulova.
