Elordanyń №58 mektep basshylyǵy dáriger Aina Bakeevamen sottaspaq. Bul týraly Nur-Sultan qalasy Bilim basqarmasy basshysy orynbasarynyń mindetin atqarýshy Asyl Amangeldieva málim etti, dep habarlaidy QazAqparat.
«Elordanyń №58 mekteptegi jaǵdai 5 qazan kúni boldy. Oqiǵa bolǵan sátte mektep direktory qalalyq ákimdikke jinalysqa ketken. Osy ýaqytta mektepke 3 áiel kelip, shý shyǵaryp, kúzetshimen tóbelesken. Basynda olar mektep direktorymen kezdesýge kelgenderin aitqan. Kelispeýshilik barysynda olar mektep kúzetshisi men medbikege qol kótergen. Búgingi tańda mektep basshylyǵy balalarǵa vaktsina salyp jatyr degen jalǵan aqparat taratqany jáne mektep kúzetshisi men medibikege qol kótergeni úshin sotqa aryzdandy», - dedi Asyl Amangeldieva Bilim jáne ǵylymi ministrliginde ótken apparat keńesi jiynynda.
Atalǵan oqiǵaǵa qatysty ministr Ashat Aimaǵambetov te pikir bildirdi.
«Balalar qaýipsizdigi týraly sóz etkende elordanyń №58 mektebinde bolǵan jaitty aitpai ketýge bolmaidy. Bul mekteptiń ishki erejesiniń buzylýy, bógde kisiniń sabaqtyń ótýine kedergi jasap qaýip tóndirýi. Atalǵan mektep basshylyǵy tiisti shara qoldanyp, jedel áreket etpedi. Jalpy aitqanda balalardyń qaýipsizdigine qaýip tóndirdi. Balalardyń ómiri men qaýipsizdigi únemi mańyzdy»,- dedi vedomstvo basshysy.
Eske sala ketsek, 26 qazanda áleýmettik jeliler men messendjerlerde qazaqstandyqtar Nur-Sultanda №58 mektepte ata-analardyń resmi túrde bas tartýyna qaramastan balalarǵa jasyryn ekpe jasalatyny týraly aqparat taraǵan edi.
Habarlamada oqýshylardyń birine dárethanada vaktsina salynǵany aitylǵan.
Degenmen oqiǵanyń shyndyqqa sáikes kelmeitindigi anyqtaldy. Ol týraly Stopfake.kz resmi habar taratty.
Keiin Nur-Sultan qalasynyń ákimshilik ister boiynsha mamandandyrylǵan aýdanaralyq soty Aina Bakeevany 10 táýlikke qamaýǵa aldy.
