Foto: Densaýlyq saqtaý ministrligi
Astanadaǵy №2 kópbeiindi aýrýhana dárigerleri óndiriste zardap shekken jigittiń qolyn aman saqtap qaldy, - dep habarlaidy "Ult aqparat".
Naýqas 7 qańtarda shuǵyl túrde aýyr jaraqatpen aýrýhanaǵa túsken. Er adamnyń oń qoly iyǵynyń joǵary tusynan bólinip ketken.
Bul qiyn otany dárigerler brigadasy eki kezeńmen jasaǵan. Birinshi kezeńde angiohirýrgtar qan aǵymyn qalpyna keltirý úshin tamyrlardy tigip, ekinshi kezeńde travmatologtar bulshyq etterdi, nervterdi, sińirler men súiekterdi qalypqa keltirdi.
"Ota shamamen 5 saǵatqa sozyldy. Biz ár otada dene múshesiniń bárin múmkindiginshe saqtap qalýǵa tyrysamyz. Bul joly tamyr-júike bailamyna tolyq reviziia jasaý kerek boldy, tigis barlyq bulshyq etke qoiyldy, óitkeni qol tolyqtai bólingen. Bastapqyda qoldy saqtap qalý jáne onyń fýnktsiiasyn qalpyna keltirý múmkindigi az edi. Otanyń sátti aiaqtalǵanyna óte qýanyshtymyz", - dedi angiohirýrg dáriger Dastan Sabyruly.
Qazir naýqas ońaltý kýrsynan ótip jatyr, dárigerler oń qoldyń jumysyn qalpyna keltirýge belsendi qatysyp, ártúrli ádisti qoldanýǵa keńes berip jatyr.
"Biz otany odan keiingi ońaltý áldeqaida jyldam júzege asatyndai etip jasai aldyq. Barlyǵy biriktirildi, qazirgi ýaqytta naýqasty eshnárse mazalamaidy", - dedi travmatolog dáriger Álimjan Dúisenbaev.
