Nursultan Nazarbaev áýejaiynda ýaqytyn únemdegisi kelgen jolaýshylar úshin «Fast track» atty jańa qyzmet túri iske qosyldy, dep habarlaidy QazAqparat.
«Bul qyzmet túri barlyq halyqaralyq áýejailarda usynylady, ol kezekte turmai ýaqytyn únemdegisi kelgen jolaýshylarǵa arnalǵan. Endigi ýaqytta bizdiń áýejaida kez kelgen jolaýshy aqysyn tólep, qol júgimen Fast track arqyly tekserýden jyldam óte alady. Negizgi júk atalǵan qyzmettiń ishine kirmeidi, tek qol júgi. Qazirgi ýaqytta Fast track arqyly tirkelý Fly Arystan jáne Qazaq Air áýe kompaniialarynyń jolaýshylary úshin qoljetimdi» , - dedi «Nursultan Nazarbaev halyqaralyq áýejaiy» AQ Basqarma tóraǵasy Ǵabit Tájimuratov.
Sondai-aq, áýejai basshysy basqa áýe kompaniialardyń atalǵan qyzmetke qosylmaý sebebin aita ketti.
«Basqa áýe kompaniialary jolaýshylardy tirkeý, tekserý qyzmetin óz esepterinen júrgizedi. Sol sebepti men ol basqa áýe kompaniialardyń jolaýshylary aldyn ala kelip tirkelgeni jón», - deidi ol.
Onyń aitýynsha, Fast track qyzmeti eresek azamattar úshin 4000 teńge, 12 jasqa deiingi balalar úshin 50 paiyz jeńildik, al 0-den 2 jas aralyǵyndaǵy sábi úshin tegin. Sondai-aq, erekshe kútimdi qajet etetin jandar úshin de atalǵan qyzmet tegin bolyp tabylady. Jáne jańa qyzmet túri bar-joǵy 3-5 minýt ýaqytty alady.
