Ádilet ministrligi Jasandy intellekt jáne tsifrlyq damý ministrligimen birlesip qoldanystaǵy servisterdiń problemalaryn joiý, ashyqtyqty arttyrý jáne notariattyq is-qimyldarǵa baqylaýdy kúsheitý úshin E-Notary tsifrlyq platformasyn iske qosady. Bul týraly Úkimet otyrysynda ádilet ministri Erlan Sársembaev málimdedi, dep habarlaidy ult.kz.
«Platformada notariýstyń árbir áreketi tirkelip qana qoimai, alǵash ret notariýstar men azamattardy biometriialyq sáikestendirýdiń integratsiiasy kózdeletin bolady, bul esepke alý derekterin zańsyz paidalanýdy boldyrmaidy jáne aqparattyq qaýipsizdik deńgeiin aitarlyqtai arttyrady. Endi azamattar platformada jeke kabinet asha alady, sol arqyly olardyń qatysýymen jasalǵan barlyq notariattyq is-áreketterdi baqylaidy, qaperinde ustaidy jáne qadaǵalaidy, qajet bolǵan jaǵdaida notariýstardyń zańsyz is-áreketterine qarsylyq bildire alady», — dep atap ótti ministr.
Sondai-aq platforma sheńberinde atqarýshylyq jazbalar jasaý úshin ótinishterdi avtomatty túrde bólý kózdelgen. Bul mehanizm mamandarǵa birkelki júktemeni qamtamasyz etýge, óndirip alýshynyń notariýsty tańdaý múmkindigin boldyrmaýǵa jáne olardyń arasyndaǵy sóz bailasý qaýpin azaitýǵa múmkindik beredi.
«Usynylǵan qujattardy taldaý, yqtimal táýekelderdi anyqtaý jáne usynymdardy qalyptastyrý úshin E-Notary jasandy intellekt elementterimen qamtamasyz etiledi. Bul rette barlyq notariattyq is-áreketterdi jasaý jónindegi túpkilikti sheshim tek notariýsta qalady», — dedi Erlan Sársembaev.
Pilottyq jobany paidalaný qorytyndysyna qarai júieni osy jyldyń sońyna deiin búkil el aýmaǵyna keńinen taratý josparlanyp otyr.
