Elimizde mektep ustazdary jetispeitin óńirler ataldy, dep habarlaidy QazAqparat.
«Pedagog defitsitine kelsek, biyl qyrkúiektegi jaǵdai boiynsha elimizde 3 myńnan astam jumys orny bos tur. Búginde Qazaqstanda 350 myńdai muǵalim baryn eskersek, salystyrmaly túrde 3 myńdy asa úlken tapshylyq dep oilamaimyn. Muǵalimderdiń jetispeýshiligi kóbinese aýyldyq jerlerdegi shaǵyn mektepterde baiqalady. Shaǵyn mektepterdegi pedagog tapshylyǵy ondaǵy júktemeniń azdyǵynan týyndap otyr. Muǵalim tapshy 3 aimaqty aitar bolsam, aldymen Atyraý oblysy, ekinshi kezekte Almaty oblysy jáne úshinshi orynda Túrkistan oblysy», - dedi QR Bilim jáne ǵylym ministrli Ashat Aimaǵambetov Úkimet úiinde onlain ótken baspasóz máslihatynda.
Ministrdiń málimdeýinshe, joǵaryda atalǵan ár óńirde 600-ge deiin bos jumys orny bar.
«Kez kelgen máseleniń eki jaǵy bar. Memleket basshysy tapsyrǵan 1000 mektep salýǵa kelsek, jańa mektep salǵan soń, oǵan qajetti mamandardy da daiarlaý kerek. Bul oraida pedagogika mamandyqtaryna bólinetin grant sany jyl sanap artyp keledi. Sondai-aq, muǵalimderdi daiarlaýda oqý baǵdarlamasyna ózgerister engizildi. Jalpy aitqanda, búginde elimizde pedagog tapshylyǵyn sheshýge arnalǵan keshendi júie bar», - deidi ol.
