«Nur Otan» partiiasy Tóraǵasynyń Birinshi orynbasary Baýyrjan Baibek Nur-Sultan qalasyndaǵy №71 mektep-litseide ashylǵan inkliýziiany qoldaý kabinetine arnaiy baryp, atalǵan baǵyttaǵy jumystarmen tanysty, dep habarlaidy "Ult aqparat".
Bul bastamany partiianyń qoldaýymen «Bolashaq» korporativti qory júzege asyryp keledi. Basty maqsat – aýtizm jáne basqa da mentaldi aýytqýshylyqtarǵa shaldyqqan balalardyń úiden emes, balabaqsha, mektep siiaqty bilim oshaqtarynda oqýyna jáne qurby-qurdastarymen qatar júrip, ortaǵa beiimdelýine jaǵdai jasaý.
«Ár bala mektepke barýǵa laiyq» jobasy aiasynda 2015 jyldan beri elimizde 36 osyndai kabinet ashylyp, jumys istep tur. Jaqyn ýaqytta «Nur Otan»-nyń qoldaýymen «Bolashaq» qory birneshe qalada taǵy 7 kabinet ashpaq.
Degenmen, «Bolashaq» KQ Qamqorshylar keńesiniń tóraiymy Dinara Shaijúnisovanyń aitýynsha, bul bastama barlyq óńirde birdei qoldaý taýyp otyrǵan joq. Máselen, Aqtóbe qalasynda eki kabinet ashý úshin qor barlyq kerek-jaraqty satyp alyp, daiyndap qoiǵan. Alaida áli kúnge deiin mektepter qajetti jóndeý jumystaryn júrgizbei, áleýmettik pedagog, psiholog jáne defektolog mamandaryn bólmei otyr. Baýyrjan Baibek bul máseleni jeke baqylaýyna alatynyn aityp, partiia tarapynan qoldaý bolatynyn jetkizdi.
– Qazirgi tańda elimizde bilim berýde erekshe qajettilikti talap etetin 150 myńnan astam bala bar. Olardyń árqaisysyn áleýmettik ortaǵa beiimdep, qoǵamnyń tolyqqandy múshesi bolýyna kómektesý – bizdiń ortaq mindetimiz. Elbasy, partiia Tóraǵasy Nursultan Ábishuly Nazarbaevtyń tapsyrmasymen «Kedergisiz keleshek» partiialyq jobasy júzege asyrylyp keledi. Osy joba aiasynda máslihattardaǵy «Nur Otan» fraktsiiasy arqyly erekshe qajettilikterdi talap etetin balalarmen jumys isteitin tárbieshilerge qosymsha qarajat bólýdi qamtamasyz etýdi usyndym, – dep Baýyrjan Baibek óziniń Instagram-daǵy paraqshasynda jazdy.
