Qazaqstanda pedagogtardyń 90 %-y koronavirýsqa qarsy vaktsina aldy. Bul týraly QR Bilim jáne ǵylym ministriniń shtattan tys keńesshisi, Narhoz ýniversitetiniń prezidenti Miras Dáýlenov málim etti, dep habarlaidy QazAqparat.
«Joǵary oqý orny qyzmetkerleri men stýdentterdiń vaktsina alý sharty bar. Vaktsina alǵan pedagogtardyń kórsetkishin 10 paiyzǵa jetkizý mindeti tur. Árine bul kórsetkishke meditsinalyq turǵydan vaktsina alýǵa bolmaityn pedagogtar kirmeidi. Qazirgi vaktsina alý úrdisi jaqsy júrip jatyr. Barlyq óńirdi qosa alǵanda pedagogtardyń 90 paiyzy vaktsina aldy. Stýdentter men oqytýshylardyń jáne oqýshylar men muǵalimderdiń densaýlyǵyn qorǵaý maqsatynda vaktsina alý mańyzdy», - dedi Miras Dáýlenov.
Odan bólek, dáris kezinde stýdentter men oqytýshylar maska taǵý rejimin saqtaýy tiis.
«Biz dástúrli oqý formatyna kóshe otyryp, epidahýaldy 2020 jylǵy 16 naýryzdaǵy jaǵdaiǵa jetkizbeýimiz kerek. Pandemiia kezinde biraz qyzmet tsifrlandyryldy. Atap aitsaq, jataqhanaǵa turýǵa ótinish berý, túrli anyqtamalar jáne sol siiaqty sharýalardy onlain iske asyrýǵa bolady. JOO-y pandemiia kezindegi tájiribelerin tiimdi qoldanýy tiis. Stýdentterdi dástúrli oqý formatyna kóshirýde Úkimet mańyzdy shara qabyldady dep oilaimyn. Degenmen bul qashyqtan oqý formaty qysqarady degen sóz emes, kerisinshe qashyqtan oqý sapaly bilimge qoljetimdilikti arttyrady», - deidi ol.
