2020 jyly Qazaqstanda múgedektigi bar adamdardy áleýmettik qoldaýǵa arnalǵan shyǵyndar 10, tehnikalyq ońaltý quraldarymen jáne arnaýly áleýmettik qyzmettermen qamtamasyz etýdi qarjylandyrý 17 paiyzǵa ósti. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
Ortalyq kommýnikatsiialar qyzmetinde onlain rejimde ótken halyqqa esep berý kezdesýi barysynda Birjan Nurymbetov múgedektigi bar adamdarǵa qoldaý kórsetý ministrlik jumysynyń eń basty degen basymdyqtarynyń biri bolyp tabylatyndyǵyn atap ótti. Máselen, erekshe qajettilikteri bar adamdardy áleýmettik qoldaýdy kúsheitý jáne olardy qoǵam ómirine tartý maqsatynda 19 normativtik-quqyqtyq aktige ózgerister engizilgen. Buǵan qosa 2020 jyly Áleýmettik qyzmetter portaly iske qosyldy. Onyń kómegimen múmkindigi shekteýli adamdar ónim jetkizýshilerden tehnikalyq qalpyna keltirý quraldaryna jáne arnaýly áleýmettik qyzmetterge tikelei tapsyrys bere alady. Portalda qazirdiń ózinde tehnikalyq qalpyna keltirý quralynyń 24 túri ornalastyrylǵan. Al portaldyń tolyq iske qosylýy 2021 jylǵa josparlanyp otyr. Budan basqa emdeý-shipajailyq em alý merzimi de retteledi. Múgedekterdiń ótinishi boiynsha jeke kómekshilerge aqy tóleýdiń biryńǵai tártibi belgilendi. Eresekterge 5 jylǵa múgedektik belgilenetin aýrýlardyń tizbesi bekitildi. Meditsinalyq-áleýmettik saraptamany syrttai júrgizýge kezeń-kezeńimen kóshý josparlanýda.
«Múgedektigi bar adamdardy áleýmettik qoldaýdy qarjylandyrý 10 paiyzǵa ósti jáne 2019 jylǵy 315 mlrd teńgemen salystyrǵanda, 2020 jyly 347 mlrd teńgeni qurady. Tehnikalyq qalpyna keltirý quraldarymen jáne arnaýly áleýmettik qyzmettermen qamtamasyz etýdi qarjylandyrý 17 paiyzǵa artyp, 2019 101 mlrd teńgege jetti», – dedi ol.
Sondai-aq, ministr aldaǵy jyldary múgedektigi bar adamdardyń ekonomikalyq belsendiligi úshin múmkindikter jasaý negizgi basymdyq retinde belgilengenin aitty.
«Búginde Qazaqstanda eńbekke qabiletti múgedektigi bar adamdardyń jalpy sanynyń tórtten bir bóligi ǵana eńbek qyzmetimen ainalysady. EYDU elderinde bul kórsetkish 40 paiyzǵa jetedi. Kelesi eki jyl ishinde aldymyzǵa múgedektigi bar adamdardyń jumyspen qamtylýyn 30 paiyzǵa jetkizý mindetin qoidyq. Ol úshin qosymsha 20 myń adamdy jumyspen qamtý qajet. Múgedektigi bar adamdarmen, úkimettik emes uiymdarmen jáne jumys berýshilermen birge múgedekterdi ekonomikalyq qyzmetke tartýǵa kedergi bolatyn negizgi túitkilderdi jáne olardy sheshý joldaryn anyqtadyq», – dedi ministr.
Onyń atap ótýinshe, múgedektigi bar adamdardy belsendi eńbekke tartý úshin olardyń quzyreti týraly derekqor qurý jáne múgedektigi bar adamdar jumys istei alatyn kásipterdiń atlasyn jasaý josparlanýda. Múgedektigi bar adamdardy jumyspen qamtýǵa járdemdesýdiń belsendi sharalaryna tartý úshin jumyspen qamtý ortalyqtarynyń qyzmetkerlerin meditsinalyq-áleýmettik saraptama oryndaryna jiberý kózdelýde. Onyń negizgi tetigi «Eńbek» memlekettik baǵdarlamasy bolady. Sonymen birge «TenQogam» áleýmettik qoldaý ortalyqtary qurý josparlanǵan. Onda biznes jobalardy damytýǵa kómek kórsetiledi jáne kásiptik bilim beriledi.
«Barlyq óńirlerde ońaltý ortalyqtary jumys jasap, múgedektigi bar 18 jastan asqan adamdardy kásiptik beiimdeý jáne saýyqtyrýmen ainalysatyn bolady. 2020 jyldan bastap 2023 jylǵa deiingi kezeńde 8 óńirde jańa ońaltý ortalyqtaryn salý josparlanýda. Jergilikti atqarýshy organdar múgedektigi bar adamdarǵa kedergisiz orta jasaý jumystaryn jalǵastyrady», – dedi Birjan Nurymbetov.
Ministr múgedektigi bar adamdardy áleýmettik qoldaýdy kúsheitý maqsatynda zańnamany odan ári jetildirý qarastyrylǵanyn basa aitty.
«Bizdiń ministrlik ázirleitin «Múgedekterdi áleýmettik qorǵaý týraly» jańa zań jobasynyń negizgi baǵyttary: múgedektigi bar adamdardyń ekonomikalyq belsendiligin arttyrý jónindegi sharalardy kúsheitý jáne olardy áleýmettik qorǵaýdyń qosymsha sharalaryn engizý», – dedi ol.
