Qazaqstanda elektr energiiasy tapshylyǵyna qatysty alańdaýshylyqqa negiz bar ma? Bul suraqqa QR Energetika ministriniń birinshi orynbasary Murat Jórebekov jaýap berdi, dep habarlaidy QazAqparat.
«Elektr energiiasyn tutynýǵa qatysty statistikaǵa súiensek, sońǵy jyldary suranys artqany baiqalady. Iaǵni elektr energiiasyn tutyný ár jyl saiyn 1-2 paiyzǵa ósip otyr. Ásirese biyl 10 aidyń ishinde tutyný kórsetkishi kúrt artty, 8 paiyzdy qurady. Bul jerde áńgime 1000-12000 MVt elektr energiiasy týraly bolyp otyr. Bul jaitty biz mainerlermen bailanystyryp otyrmyz. Búginde elimizde 50-ge jýyq mainingtik data ortalyǵy bar. Jalpy mainingtik uiymdarǵa artatyn kiná joq, degenmen otandyq naryqta kóleńkeli mainingtik qyzmetpen ainalysatyn kompaniialardyń baryn da jasyrmaý kerek. Jáne olardyń úlesi jyl saiyn artyp keledi», - dedi Murat Jórebekov OKQ-de ótken baspasóz máslihatynda.
Osy oraida vitse-ministr kóleńkeli mainingtik kompaniialarǵa qarsy kúres júrgiziletinin eske saldy.
Sondai-aq, M. Jórebekov «Elimizde elektr energiiasy tapshylyǵy týyndaýy múmkin be?» degen saýalǵa qatysty pikir bildirdi.
«Joq, biz tapshylyqtyń týyndaýyn kórip turǵan joqpyz. Elimizde elektr energiiasy júiesi turaqty, degenmen tutynýdyń artýyna bailanysty aldyn alý sharasyn qabyldaǵan jón. Jáne baǵa turaqtylyǵy da nazarda bolýy tiis. Sonymen qatar zańsyz jumys isteitin mainingtik uiymdardyń máselesin qolǵa alý kerek. Elektr energiiasyn aýqymdy kólemde qoldanatyn solar», - dep jaýap berdi ministrdiń birinshi orynbasary.
Onyń aitýynsha, 1000-1200 MVt elektr energiiasyn óndirý úshin 5 jyl ýaqyt jáne 1-1,5 mlrd AQSh dollary kóleminde qarjy kerek eken.
